“Şəki” Azərbaycan Basketbol Liqasının V turunda “Gəncə”yə 84:70 hesabı ilə qalib gəlib.

Prosport.Az xəbər verir ki, hər iki komandanın baş məşqçisi matçla bağlı fikirlərini bölüşüb.

Bedri Meriç ("Şəki"): “Keçən mövsüm “Gəncə” ilə 7 dəfə oynadıq, ona görə də bu oyunlar həmişə xüsusi olur. Eyni məşqçi heyəti ilə yaxşı təşkil olunmuş oyunlar keçirilir. Möhkəm müdafiə və aqressiv hücum sayəsində qalib gəldik. Çətin bir həftə idi. Yenə məşq otağı ilə bağlı problemlərimiz oldu. Malek Devis zədələndi, amma keçmiş komandasına qarşı oynamağı xahiş etdi. Devon Cenkins formada çətinlik çəkdi və yalnız ikinci hissədə kömək edə bildi. Gəncəyə qədər uzun bir yol qət etmişik və bu qələbə bizim üçün xüsusilə əhəmiyyətlidir. Komanda ruhu geri döndü. Bəziləri "Şəki"ni A qrupunun ən zəif komandası hesab edə bilər, amma biz bəzi sürprizlər edəcəyik. Xüsusilə də ev oyunlarında. Uşaqlara xarakterlərinə və fədakarlıqlarına görə təşəkkür edirəm”.

Halil Atlı ("Gəncə"): "Əvvəlcə rəqibimizi təbrik edirəm. Meydanda yaxşı mübarizə apardılar, qələbə qazanmağa layiq oldular. Daha istəkli tərəf onlar görünürdü. Biz oyuna bir az konsentrasiyasız başladıq. Bu da təsirini göstərdi. Texniki olaraq danışılacaq bir şey yoxdur. Amma bütün parametrlərlə baxdığımızda rəqibimizdən üstünük. Daha çox topla oynamışıq. Yalnız hesab olaraq geridə qaldıq. Bu da dediyimiz kimi, konsentrasiya ilə bağlıdır. İstədiyimizi həyata keçirə bilmədik və nəticəsi də belə oldu. Arzulamadığımız məğlubiyyət idi. Zalı dolduran azarkeşlərimizə təşəkkür edirəm. Bizi lazımınca dəstəklədilər. Onlara qələbə bəxş etmək istərdik. Yaxşı komandayıq, bunu bilirik. Səhvlərimizi azaltmalıyıq. Rəqibə yox, öz oyunumuza konsentrasiya olunmalıyıq. Vəziyyəti düzəldib yolumuza davam edəcəyik".