"Biz bu gün istədiyimizi meydançada edə bilmədik. Müdafiədə çox zəif oynadıq. Məqsədlərimiz tamamilə başqa idi".

Prosport.Az xəbər verir ki, bu sözləri NTD-nin baş məşqçisi Tahir Baxşıyev Azərbaycan Basketbol Liqasının V turunda "Neftçi"yə 71:99 hesabı ilə uduzduqları oyundan sonra deyib.

Mütəxəssis oyun ərzində cəmi 14 fol etdiklərini bildirib: "Uduzan komanda üçün bu, çox azdır. Daha aqressiv müdafiə olunmalı idik. İşləməyə davam edəcəyik. Komandamıza 2 yeni oyunçu qoşulub. Onlar özlərini pis göstərmədilər. Tam heyətlə yalnız son bir həftədə məşq etməyə başladıq. Çox çətin idi. İndi isə demək olar ki, heyəti tam formalaşdırmışıq və “Gəncə”yə qarşı oyuna hazırlaşacağıq. Bu, çox vacib matçdır və güclü rəqibə qarşı oynayacağıq. Hər iki komanda qələbə qazanmaq üçün çox istəkli olacaq. Onlar da bu turda məğlub olublar. Biz də qələbəyə köklənəcəyik".