"Çətin oyun alındı. Son anda bildik ki, yeni oyunçumuz - Lanqdon Hatton bu oyunu buraxacaq. Lisenziyasını vaxtında ala bilmədi".

Prosport.Az xəbər verir ki, bu sözləri NTD-nin baş məşqçisi Tahir Baxşıyev Azərbaycan Basketbol Liqasının IV turunda "Şəki"yə 81:88 hesabı ilə məğlub olduqları oyundan sonra deyib.

Mütəxəssis bildirib ki, məhz buna görə zədəli Camal Kinqi meydana buraxmaq məcburiyyətində qalıb: "Bir həftə məşq etməmişdi. Buna baxmayaraq, komanda mübarizə apardı, sonadək oynadı. Amma bizə ribaundlarda böyük oyunçu çatışmırdı. Hatton bizə bu baxımdan kömək edə bilərdi".

Baş məşqçi komandanın hələ tam formalaşmadığını söyləyib: "Hazırda cəmi 4 legioner oynayır. Amma bu məsələni həll edirik. Hatton artıq bizə qoşulub. Tezliklə daha bir legioner gələcək. Ruhdan düşmürük. Ən vacibi odur ki, komanda mübarizə aparır, istəklə oynayır. Düşünürəm, tezliklə qələbələr də gələcək".