"Biz ardıcıl 4-cü oyundur döyüşürük. Komandamızın matça köklənməsi xoşuma gəldi".

Prosport.Az xəbər verir ki, bu sözləri "Sumqayıt"ın baş məşqçisi Vadim Kuramşın Azərbaycan Basketbol Liqasının IV turunda 81:116 hesabı ilə uduzduqları oyundan sonra deyib.

Mütəxəssis heyətlə bağlı müəyyən problemlərin olduğunu bildirib: "Bir amerikalı basketbolçu ilə yollarımızı ayırdıq. Bu da oyunumuza mənfi təsir göstərir. Yenə də eyni səhvlər... Mərkəz oyunçumuz fol limitinə görə  kənara çəkiləndə rəqib xal fərqini artırır. Ancaq Fuad Niftəliyev bu gün mükəmməl idi. 45 yaşlı veteran 22 xal topladı. Əhsən! Ümid edirəm ki, amerikalı basketbolçu transfer edəndən sonra vəziyyəti düzəldəcəyik".

Baş məşqçi hakimliyə də toxunub: "Yumşaq desək, onlar ümidləri doğrultmadı. 3-cü periodda çox kobud səhvlərə yol verdilər".