"Son oyundan sonra bu matça hazırlıq üçün 2 gün vaxtımız var idi. Müdafiədə bəzi dəyişikliklər edəcəyik".

Prosport.Az xəbər verir ki, bu sözləri "Abşeron Layns"ın baş məşqçisi Ərhan Tokər FIBA Avropa Kubokunun əsas mərhələsində bu gün Polşanın "Trefl" komandasına qarşı keçirəcəkləri II tur oyunundan öncə klubun mətbuat xidmətinə açıqlamasında deyib.

Türkiyəli mütəxəssis yaxşı nəticə qazanacaqlarına inandığını bildirib: "Hücumla bağlı problemimiz yoxdur. Az xal qazanmırıq. Müdafiəni düzgün təşkil etsək, qələbə şansımız çoxalacaq".

O, "Kalev"lə oyundakı qələbəyə görə "Neftçi"ni təbrik edib: "Yaxşı oynadılar. Cərimə atışlarını çox qaçırmalarına baxmayaraq, 3-lük atışlarda yaxşı təsir  bağışladılar. Bizim oyun onlara gözəl nümunə oldu deyə düşünürəm. Bir daha təbrik edirəm".

Qeyd edək ki, qarşılaşma bu gün, saat 19:00-da Bakı İdman Sarayında start götürəcək. "Abşeron Layns" ilk görüşdə "Kalev"ə uduzub - 85:93.