"Bütün azarkeşləri, hamınızı təbrik edirəm. Düşünürəm ki, "Neftçi" Azərbaycanı çox gözəl təmsil etdi".

Prosport.Az xəbər verir ki, bu sözləri "Neftçi"nin baş məşqçisi Vitali Stepanovski Bakıda Estoniya təmsilçisi "Kalev"ə 95:84 hesabı ilə qalib gəldikləri FIBA Avropa Kubokunun əsas mərhələsinin II tur oyunundan sonra mətbuat konfransında deyib.

Mütəxəssis bunun "Neftçi" üçün tarixi və çox vacib qələbə olduğunu bildirib: "Biz Polşada da yaxşı oynamışdıq. Bu oyunda da ilk və son 3 dəqiqəni çox yaxşı keçirdik, xarakter göstərdik. Elə oldu ki, sonda 11 xal önə çıxdıq. Oyunçularımızın bəziləri yaxşı vəziyyətdə deyildi. Xüsusilə, Camal Beyin və Amil Həmzəyevin sağlamlıqla bağlı problemləri var idi. Onu da qeyd etməliyəm ki, Qrin çox yaxşı oyun göstərdi".

O, sonda bir daha hər kəsi təbrik edib: "Azarkeşlərə möhtəşəm dəstəklərinə görə çox böyük təşəkkür edirəm. Artıq növbəti matçlara baxacağıq".