“Çimərlik güləşi üzrə ilin son yarışı idi. Dünya Seriyasının final mərhələsində 2 çəkidə iştirak edirdik. 80 və 90 kq-da dünya çempionu olduq".

Prosport.Az xəbər verir ki, bu sözləri çimərlik güləşi üzrə Azərbaycan millisinin baş məşqçisi Oyan Nəzəriani jurnalistlərə açıqlamasında deyib.

Misirin paytaxtı İsgəndəriyyədə keçirilmiş dünya çempionatındakı nəticələri şərh edən mütəxəssis bildirib ki, bu 5 seriyada toplanan xalların nəticəsində 80 kq-da 19 yaşlı Vüsal Əliyev dünya çempionu olub: "O, böyüklərdə ilk dəfə dünya çempionatına qatılırdı. Təcrübəli güləşçimiz İbrahim Yusubov isə artıq 4-cü dəfədir ki, dünya çempionu olur. Bizi yenə sevindirdi. 80 kq-da Sahib Dadaşov da iştirak edirdi. O da seriyanın son mərhələsində bürünc medal qazandı".

O, qarşıdakı hədəflərdən də söz açıb: "Artıq gələn il üçün planlarımızı qurmuşuq. Yeniyetmələrin Yay Olimpiya Oyunlarında iştirak etməyə namizəd idmançılarımızı seçmişik. 2026 bizim üçün çox məsuliyyətli ildir. Çimərlik güləşi hər yaş qrupunda 4 çəki oğlanlar və 4 çəki qızlardan ibarətdir. Gələn il komanda hesabında dünya çempionu olmaq üçün kişilərdə 4 çəkinin hamısında iştirak etməyi planlaşdırırıq. Yüksək nəticələrimizin əsas səbəbi Azərbaycan Güləş Federasiyasının çimərlik güləşinə peşəkarcasına və strateji yanaşmasıdır. Çünki çimərlik güləşi dünyada yeni formalaşır. Amma çox güclü gəlir. Bir çox ölkələr artıq öz yerini tutub. Ön sıralarda olan ölkələrdən biri də bizik. Federasiyanın uzaqgörən siyasəti sayəsində gördüyünüz bu nəticələri əldə etmişik. Çimərlik güləşində iddiamızı daha da artırmağa çalışacağıq”.