Azərbaycanlı kikboksçu Bəhram Rəcəbzadə Niderlandın Rotterdam şəhərində keçirilən “Glory 104” döyüş gecəsi çərçivəsində növbəti qarşılaşmasına çıxıb.

Prosport.Az bildirir ki, o, mərakeşli Tarik Xbabezlə qarşılaşıb.

Qarşılaşma 5 raundun yekununda hakimlərin yekun qərarına əsasən mərakeşli döyüşçünün qələbəsi ilə başa çatıb. Bununla da Niderland vətəndaşı da olan Tarik Xbabez yüngül ağır çəkidə yeni çempion olub.

Döyüşün ardından 34 yaşlı Urmiya doğumlu təmsilçimiz ona 2-ci dəfə haqsızlıq edildiyini əsas gətirərək karyerasını bitirdiyini bildirib.

Qeyd edək ki, Bəhram Rəcəbzadə indiyədək 72 qələbə, 5 məğlubiyyət və 64 nokautluq göstəriciyə sahib idi. Həvəskar kikboksinqdə dünya çempionu, Avropa mükafatçısı, Ümumdünya Oyunlarının və İslam Həmrəylik Oyunlarının qalibi olmuş Bəhram ötən il ağır çəkidə niderlandlı Levi Rixtersə uduzaraq kəməri əldən vermişdi. O, həkimlərin qərarı ilə döyüşü dayandırmışdı.