"İlk növbədə bütün oyunçuları, heyət üzvlərini, rəhbərliyi və azarkeşləri təbrik etmək istəyirəm. Bu, çempionatda ilk qələbəmizdir".

Prosport.Az xəbər verir ki, bu sözləri "Neftçi"nin baş məşqçisi Vitali Stepanovski Azərbaycan Basketbol Liqasının II turunda "Şəki"yə 92:68 hesabı ilə qalib gəldikləri oyundan sonra deyib.

Mütəxəssis matça bir qədər gərgin başladıqlarını bildirib: "Hücumda və müdafiədə bəzi səhvlər etdik. Öz oyunumuzu oynamağa başlayandan sonra hər şey daha asan olacaq və rəqiblərimizi səhvlərindən istifadə edərək, onları daha çox cəzalandırmağa başlayacağıq".

Baş məqşçi müdafiədə kifayət qədər yaxşı oynadıqlarını söyləyib: "Əlbəttə ki, bəzi səhvlərimiz oldu. Ancaq hələ də komandanı qurma mərhələsindəyik desək, doğru olar. Bildiyiniz kimi, Marko Sinik komandamıza çox qısa müddət əvvəl qoşulub və bizimlə cəmi bir məşq edib. Son günlər biz yalnız 8 oyunçu ilə çalışırdıq. Ümid edirəm ki, hər şey zamanla daha yaxşı olacaq. Hazırda komandamızda əhval-ruhiyyə və enerji yüksək səviyyədədir. Bu əhval-ruhiyyə ilə də FIBA Avropa Kubokundakı ilk oyunumuza çıxacağıq. Bir daha hamını təbrik edirəm!".