III MDB Oyunlarının Açılış mərasimində Azərbaycanın bayraqdarı olmuş karateçi Asiman Qurbanlı Oyunların gümüş medalçısı olub.

Prosport.Az xəbər verir ki, o, qazandığı medal barədə təəssüratlarını jurnalistlərlə bölüşüb.

"Əslində hisslərim qarışıqdır. Mən komandadakı ən yaşlı idmançıyam — 33 yaşım var. 2 dəfə əməliyyat keçirmişəm və qarşıma məqsəd qoymuşdum ki, mümkün qədər tez bərpa olunub bu Oyunlarda iştirak edim. Cəmi 2 ay ərzində sağalaraq yarışlara qatıla bildim. Bu çox qısa vaxtdır. Düşünürəm ki, bu, özü-özlüyündə kifayət qədər ciddi bir nailiyyətdir".

O bildirib ki, yaş və zədələr özünü göstərsə də, gənc idmançılardan daha yaxşı nəticələr əldə edir: "Son 2-3 ayda yenidən tam gücümlə məşqlərə başlamışam və formamı daha da yaxşılaşdıracağıma inanıram".

Lakin karateçi təzyiq hiss etdiyini də gizlətməyib. “Məğlub olmağı sevmirəm. Uduzanda bunu çox ağır qəbul edirəm. Bəzən özümü tənqid edir, özümə qarşı sərt oluram, amma bu hissləri ictimaiyyət qarşısında büruzə verməməyə çalışıram. Bunlar mənim daxilimdə yaşadığım emosiyalardır".

Asiman Qurbanlının sözlərinə görə, Azərbaycan bayrağını daşımaq onun üçün xüsusi qürur mənbəyidir. "Azərbaycanın bayrağını arenaya çıxarmaq mənim üçün böyük şərəf idi. Xüsusilə də mərasimdə Prezident İlham Əliyevin iştirak etməsi bu anı mənim üçün daha da xüsusi etdi. Bu, həyatımın ən əhəmiyyətli və yaddaqalan anlarından biri oldu".