Bu gün Gəncədə III MDB Oyunları çərçivəsində 3x3 basketbol yarışlarına start verilib.

Prosport.Az xəbər verir ki, oğlanlardan və qızlardan ibarət Azərbaycan yığma komandaları (U-17) yarımfinala yüksəlib.

A qrupunda yer alan oğlanlardan ibarət komandamız (Hüseyn Qaflanov, Emanuel Aqbasan, İsmayıl Abdullayev və Oğuzxan Quliyev) Tacikistanı (21:13) və Qırğızıstanı (18:6) məğlub edib, Rusiyaya məğlub olub – 8:21. Qrupu 2-ci yerdə tamamlayan yığmamız yarımfinala adlayıb. Yarımfinalda Azərbaycan yığması B qrupunu lider kimi tamamlayan Belarus millisi ilə qarşılaşacaq. Digər yarımfinalda Rusiya Özbəkistanla qarşılaşacaq.  

Qızlardan ibarət komandamız (Polina Şukina, Dəniz Gökçöl, Angelina İsmayılova və Leyla Allahverdiyeva) turnirə Özbəkistana (13:16) məğlubiyyətlə başlasa da, ardıcıl qələbələr qazanaraq yarımfinala adını yazdırıb. Millimiz Qazaxıstanı (20:5), Rusiyanı (19:18) və Belarusu (18:17) məğlub edib. 

Qızlardan ibarət turnirdə 5 komanda mübarizə aparıb. Turnir dairəvi sistemlə keçirilib və ilk 4 yeri tutan komandalar yarımfinala yüksəlib. Azərbaycan yığması yarımfinala 1-ci yerlə adlayıb. Yarımfinalda rəqibimiz Özbəkistan yığması olacaq. Digər yarımfinalda Rusiya Belarusla qarşılaşacaq. 

Yarımfinallar, 3-cü yer uğrunda oyunlar və finallar sabah saat 16:00-dan etibarən keçiriləcək.