İrina Zaretska III MDB Oyunlarında Azərbaycanı təmsil edən idmançılar arasında ən titullusu idi. Olimpiya 2-cisi, üçqat dünya və ikiqat Avropa çempionu kimi MDB Oyunlarına qatılan Ukrayna əsilli idmançı öz səviyyəsini turnirdə göstərə bildi.

29 yaşlı idmançı A qrupunda Nuriyə Tizimbaya (Qazaxıstan) 8:0, Volqa Romanyuka (Belarus) 8:1 qalib gəldi. Yarımfinalda Aleksandra Meşkovaya (Rusiya) və finalda Bonu Yeqamberdiyevaya (Özbəkistan) 4:2 qalib gələrək çempion oldu.

Prosport.Az-ın Mingəçevirə ezam olunmuş əməkdaşı İrina Zaretskadan müsahibə götürüb. 

– Yarış sizin üçün necə keçdi?
– Yarış çox gözəl keçdi. Azərbaycan arenasında çıxış etməyi çox sevirəm. Hər zaman Azərbaycandan böyük dəstək görürəm. Məni dəstəkləyənlərə təşəkkürümü bildirirəm. Azərbaycan yığması bu yarışda çox gözəl nəticə əldə etdi... Ana olduqdan sonra 2-ci böyük turnirim idi. Qızıl medal qazandım. Əlbəttə, çox şadam.

– Ən çətin döyüşünüz hansı oldu?
– Rəqiblərə 8:0, 8:1 qalib gəldim. 2 dəfə də 4:2 qalib gəldiyim döyüşlər oldu. Mən tatamidə sözümü dedim (gülür).

– Deməli, rəqiblərin səviyyəsi yüksək deyildi...
– Və ya mənim səviyyəm çox yüksək idi (gülür).

– Siz Olimpiada mükafatçısı, dünya və Avropa çempionusunuz. MDB Oyunlarına köklənmək çətin olmadı?
– Bilirsiniz, çempion odur ki, bir dəfə qızıl medal qazandıqdan sonra yenə buna köklənir. Mənim üçün hər qələbə yuxarıya doğru bir pillə deməkdir. Adımı tarixə yazdırmaq istəyirəm.

– Yarımfinalda rusiyalı idmançı ilə görüşünüz barədə nə deyə bilərsiniz? Uzun müddətdən sonra bu ölkənin təmsilçisi ilə qarşılaşdınız...
– Mənim üçün bu ölkənin idmançısına qalib gəlmək prinsipial idi. Çünki indi bu ölkəyə görə Ukraynada müharibə gedir. Oyunları boykot etmək istəmədim. Onları burada məğlub etmək üçün bura gəldim.

– Bu ilin sonunda əvvəl Səuduiyyə Ərəbistanında İslam Həmrəyliyi Oyunlarında, daha sonra Misirdə dünya çempionatında iştirak edəcəksiniz. Oradakı hədəflərdən də danışaq...
– Bu yarışlar mənim formada olmağımı göstərəcək. Məqsəd yenə çempion olmaqdır. Burada qızıl medal qazanmaqla Azərbaycan bayrağını qaldırdım. Orada da əsas məsələ bu bayrağı qaldırmaq olacaq.

– Ümumdünya Oyunlarının finalında uduzduğunuz, prinsipial rəqibiniz İsveçrə təmsilçisi Elena Kuiriçidən revanş almaq mümkün olacaq?
– Hazırda o, bu çəkidə 1, mən isə 2 nömrəyəm. Bunadək son 6 ildə mən 1 nömrə idim. Həmin Ümumdünya Oyunlarında ona uduzdum. Ancaq qorxulu heç nə yoxdur. Hər şeyi edəcəyəm ki, reytinqdə yenidən 1-ci sıraya yüksəlim.

Səbuhi Musa