"Öz vətənimizdə bayrağımızı qaldırıb, himnimizi gözəl xalqımızla birgə oxumaqdan gözəl hiss yoxdur. Hər bir Azərbaycan vətəndaşı bu hissi yaşamalıdır".

Bunu Prosport.Az-ın Mingəçevirə ezam olunmuş əməkdaşına müsahibəsində III MDB Oyunlarının karate/kata yarışlarında çempion olmuş Roman Heydərov deyib.

A qrupunda Rəsul Atacanovu (Türkmənistan) 24,6:22,2 Yerdos Kenjaliyevi (Qazaxıstan) 23,5:22,9, Səməndər Urazaliyevi (Özbəkistan) 24:23,2 hesabı ilə məğlub edən Roman Heydərov yarımfinalda Konstantin Sutyaqini (Rusiya) 24,2:23,6 hesabı ilə yenərək finala çıxıb. Avropa çempionatının beşqat mükafatçısı olan Roman burada da finalda yenidən Səməndər Urazaliyevi 23,8:23,3 hesabı ilə məğlub edərək çempion olub.  

26 yaşlı idmançı qələbə ilə bağlı fikirlərini bildirib: "Yarımfinalda qarşılaşdığım Rusiyadan olan rəqibimlə ötən dəfəki MDB Oyunlarında da qarşılaşmışdım. Bu dəfə də onu məğlub etdim. Mənim finaldakı rəqibim özbək idmançı idi. Onun finala çıxması mənim üçün sürpriz oldu. Gözəl, talantlı, gələcəyi parlaq olan, tərifəlayiq olan idmançıdır".

Roman Heydərov yarışa xəstə halda qatıldığını vurğulayıb: "Səhər saat 9-dan Mingəçevirdəki zaldayam. 5 dəfə tərləyib soyumuşam. Xəstələnmişəm, səsimdən də eşitdiyiniz kimi, boğazım tutulub. Dərmanla bir neçə saat qızışma edib hazırlaşmaq çox çətindir".

Səbuhi Musa