Azərbaycanda keçirilən III MDB Oyunlarında karate üzrə ilk yarış günündə idmançılarımız 9 medal (3 qızıl, 2 gümüş və 4 bürünc medal) qazanıb.

Prosport.Az-ın Mingəçevirə ezam olunmuş əməkdaşı xəbər verir ki, kumite yarışlarında Mədinə Sadıqova (55 kq) finalda öz həmyerlisi Nəzrin Piriyevaya 9:1, Nuran Rzazadə (67 kq) isə Erlan Akılbek Uuluya (Qırğızıstan) 7:3 qalib gəlib. Katada isə beşqat Avropa 3-cüsü Roman Heydərov çempion olub. Təcrübəli idmançı finalda Səməndər Urazaliyevə (Özbəkistan) 23,8:23,3 hesabı ilə qalib gəlib.

Nəzrin Piriyevadan başqa, Fərid Savadov (60 kq) Darxan Timraliyevə (Qazaxıstan) 1:4 hesabı ilə uduzaraq gümüş medalla kifayətlənib.

I MDB Oyunlarının qalibi İnci Əzizova (50 kq), Aslan Dostuyev (67 kq), katada isə Ramilə Heydərova və Rövşən Əliyev yarımfinalda uduzduqları üçün bürünc medalla təltif olunub.