III MDB Oyunları çərçivəsində Yevlax Olimpiya İdman Kompleksində keçirilən boks yarışında Azərbaycan millisinin 5 üzvü finala yüksəlib.

Prosport.Az xəbər verir ki, Qardaş Rəhimov (46 kq) tacikistanlı Damir Nazarova qalib gələrək (3:2) finala çıxıb.

60 kq çəki dərəcəsində yarımfinalda mübarizə aparan Şahin Aslanov rusiyalı Dmitri Klyuşnikovdan üstün olub – 4:1. Səfdər Məmmədzadə (+80 kq) qazaxıstanlı Yerketanq Jarkınbeka qalib gələrək (5:0) finala vəsiqəni təmin edib.

Əli Əliyev (48 kq) isə digər Qazaxıstan təmsilçisi Baltin Korqanbekdən üstün olub – 3:2. Digər yarımfinal görüşündə azərbaycanlı idmançı Əli Abaslı (52 kq) türkmənistanlı Xangeldi Lukmanova qalib gəlib – 5:0.

Əli Ruşanov (46 kq), Ayxan Həsənov (50 kq), Toğrul Quliyev (60 kq), Şikar Əliyev (75 kq), Əflatun İsmiyev (57 kq), Raul Heydərli (57 kq), Haqverdi Həsənov (63 kq), Adil Zalov (70 kq və İsmayıl Vəliyev isə (80 kq) yarımfinal döyüşlərində məğlub olaraq bürünc medalla kifayətləniblər.

Qeyd edək ki, kişi boksçular arasında final qarşılaşmaları oktyabrın 5-də keçiriləcək.