"Lənkəran" Azərbaycan Basketbol Liqasının ilk turunda doğma meydanda “Sumqayıt”a 93:82 hesabı ilə qalib gəlib.

Prosport.Az xəbər verir ki, hər iki komandanın baş məşqçisi matçla bağlı fikirlərini bölüşüb:

Vadim Kuramşın ("Sumqayıt"): "Əvvəlcə rəqibi qələbə münasibətilə təbrik edirəm. Onlar üçün yaxşı başlanğıc oldu. Biz isə tam heyətlə oynaya bilmədiyimizə görə öz oyunumuzu göstərməkdə çətinlik çəkdik. Sonuncu transfer etdiyimiz amerikalı oyunçu Elayca Hatçins-Everett 3 gün əvvəl düşərgəmizə gəldiyinə görə qeydiyyatla bağlı problemlər yaşadıq. Bu gün onun xidmətindən yararlana bilmədik. Belədə ikinci hissədə çətinliklərlə üzləşdik. Xüsusən də ribaundları uduzmağımız bizə problem yaratdı. Amma istənilən halda oyunçularım sona qədər mübarizə apardı. Maraqlı qarşılaşma izlədik. Növbəti matçda tam heyətlə meydana çıxacaq və daha yaxşı oynayacağıq".

Georgi Kondruseviç ("Lənkəran"): "Azərkeşlərə dəstəyə görə təşəkkür edirəm. İlk dəfə evdə qələbə qazandıq. Ümid edirəm ki, bu qələbələrin davamı olacaq. İlk hissədə 10 xal geridə olmağımız top itkiləri ilə bağlı idi. Soyunub-geyinmə otağında söhbətlərdən sonra 2-ci hissədə daha az top itirdik. Bu da nəticədə və hücumların keyfiyyətində özünü göstərdi. Oyun göstərdi ki, biz nələrin üstündə daha çox çalışmalıyıq.H eç bir yoldaşlıq oyunu oynamadan yeni toplaşmış komanda olaraq qələbə qazanmağımız təbii ki, nəticədən məmnun olmağıma gətirib çıxartdı. Amma oyunun keyfiyyəti yüksək deyil. Üzərində işləyəcəyimiz məqamlar var".