"Yoxlama matçı keçirmədiyimiz üçün oyuna adaptasiya olmağımız baxımdan bir az çətinlik çəkdik. Amma yenə də oyunçularımın göstərdiyi performansdan məmnunam".

Prosport.Az-ın xəbərinə görə, bunu "Şəki" basketbol klubunun baş məşqçisi Bedri Meriç deyib.

Türkiyəli məşqçi Azərbaycan Basketbol Liqasının ilk turunda səfərdə "Abşeron Layns"a 81:90 uduzmalarından danışıb: "Komanda şəklində mübarizə aparan bir heyətimiz var. Şəkidə keçirəcəyimiz ilk matçda daha hazır olacağımızı düşünürəm. Zamana ehtiyacımız var. Bütün basketbolçularımı yaxşı oyuna görə təbrik edirəm. "Abşeron Layns"ı da qələbəyə görə təbrik edirəm. Ümid edirəm ki, FIBA Avropa Kubokunda mərhələni keçib Azərbaycanı müntəzəm mövsümdə təmsil edərlər.

Samir Styuart bu gün "tripl-dabl" etdi. Komandanın kapitanı olaraq ondan çox şey gözləyirik. Zamanla o, çempionatda daha çox fərqlənən qardlardan biri olacaq. Ərcan Donat və Rəşid Abbasov milli komandanın oyunçularıdır. Hər ikisi 5 faulla cəzalandırıldı. Rəşidin bugünkü performansından razıyam, ancaq mental olaraq özünü kontrol etməsi lazımdır. Eyni sözlər Ərcana da aiddir. Faul probleminə görə onlardan meydanda istədiyimiz faydanı ala bilmədik. Amma əminəm ki, getdikcə hər ikisi yaxşı ritmə düşəcək. Ümumilikdə dediyim kimi, komandanın oyunundan çox razıyam. Uşaqlar əllərindən gələni etdilər".