"Bizim buna qədər avrokubokda 1 oyunumuz olduğu üçün bu oyuna tam konsentrasiya ola bilməmişdik. Çox yaxşı oynaya bilmədik. Xüsusilə ilk dövrədə".

Prosport.Az-ın xəbərinə görə, bunu "Abşeron Layns"in baş məşqçisi Ərhan Tokər deyib.

Türkiyəli məşqçi "Şəki" ilə Azərbaycan Basketbol Liqasının ilk turunun matçında 91:80 qalib gəldikləri matç barədə fikirlərini bildirib: "Təbii ki, rəqib də çox sürətli oynadı. Biz "Anortosis"lə matçı düşünərək Ceyln Şou və Saadettin Donatı da əsas heyətdə oynatmaq istədik ki, ritmi itirməsinlər. Yoxsa ilk dəqiqələrdən daha qısa oyunçularla oynaya da bilərdik. Məhz belə etməyimiz də rəqibin xeyrinə oldu. Onlar bunu yaxşı dəyərləndirdi.

Əsas odur ki, qələbə sonda bizim oldu. İndi bütün fikrimiz "Anortosis"lə səfər oyununa köklənəcək. Qediminas Orelikin dizində ağrıları var. Ümid edirəm ki, matç saatına qədər hazır duruma gələcək. Bu gün də məcburiyyətdən çox oynadı. Qarşıdakı avrokubok oyununa bütün çatışmazlıqları aradan qaldırıb tam hazır formada olacağıq. Qarşıda 2 əsas məşq və səfər bizi gözləyir".