"Əvvəla, yenidən "Şəki"də olduğum üçün çox xoşbəxtəm. 1 il daha burdakı heyətlə birgə olmaq həqiqətən yaxşıdır".
Prosport.Az xəbər verir ki, bu sözləri "Şəki" basketbol klubunun baş məşqçisi Bedri Meriç yeni mövsümün startı ilə bağlı danışarkən deyib.
Bu il A qrupunda mübarizə aparacaqlarını söyləyən türkiyəli mütəxəssis bunun komandası üçün fərqli təcrübə olacağını bildirib: "Çünki A qrupunda bizdən güclü olan komandalarla qarşılaşacağıq. Bu qrupda 3 komanda avrokuboklarda çıxış edir. Həmçinin, "Gəncə" büdcəsi yaxşı olan komandadır. NTD ötən mövsüm Azərbaycan Kubokunun sahibidir, komandanı millinin baş məşqçisi Tahir Baxşıyev çalışdırır".
O, bu mövsüm işlərinin bir az çətin olacağını vurğulayıb: "Ancaq göldənsə, böyük dənizdə mübarizə aparıb boğulmaq hər zaman yaxşıdır. Bu mövsüm çempionatda əsl hədəfimiz son 8 komanda arasına (1/4 finala) düşməkdir. B qrupundan gələn komanda ilə pley-ində qarşılaşıb pley-offa çıxmağa çalışacağıq".
Baş məşqçi ilk turdakı rəqibləri olan "Abşeron Layəns"i çox güclü komanda adlandırıb: "FIBA Avropa Kubokunun təsnifat mərhələsində Kiprin "Anortosis" komandasına qalib gəldilər. Cavab oyununda da qalib gələcəklərini və qrup mərhələsinə vəsiqə qazanacaqlarını düşünürəm. Çətin rəqibdir, yaxşı heyəti var. Baş məşqçiləri Ərhan Tokər çox təcrübəlidir. Amerikalı CeyCey Freyzer ("Samsunspor" və "Bornova Bələdiyyəspor"da oynayıb) və litvalı Qediminas Orelik ("Banvit" və "Beşiktaş"da oynayıb) Türkiyədən tanıdığım basketbolçulardır. Çempionatın səviyyəsini artıracaq belə oyunçuların transfer edilməsi çox yaxşı haldır. Bizim oyunçular üçün də yaxşı bir təcrübə olacaq.
B.Meriç ilk oyunu evdə keçirə bilməyəcəkləri üçün təəssüfləndiyini gözləməyib: "Təəssüf ki, III MDB Oyunlarında gimnastika yarışlarının keçirilməsi ilə əlaqədar olaraq, Şəki Olimpiya İdman Kompleksində məşq və ev oyunlarımızı keçirə bilmirik. Hər gün Qax Olimpiya İdman Kompleksinə məşq üçün getməli oluruq. Bu da hazırlıq zamanı bizi çox yordu. Yoxlama oyunu keçirə bilmədik. Bu səbəbdən də ilk 2 matçımızı yoxlama oyunu qismində görürük. Oktyabrın 8-dək MDB Oyunları keçiriləcək deyə, öz meydanımızdan istifadə edə bilməyəcəyik. Ona görə də ilk matçlarımızı Bakıda oynayacağıq. Əminəm ki, öz meydanımıza keçdikdən sonra Şəki bütün komandalar üçün ən çətin səfər olacaq. Ötən mövsümkü kimi eyni ruhda oynasaq, evdə çox matçda qalib gələcəyimizi və çoxlu sürpriz edəcəyimizi düşünürəm".