Azərbaycan Basketbol Liqasının yeni mövsümünün açılış turunda “Sabah” "Neftçi"yə 86:75 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi nəticəni şərh edib:

Rimas Kurtinaytis ("Sabah"): "İlk oyun asan olmadı. Çünki komanda mövsümə hazırlaşanda mən Litva millisi ilə birgə Avropa çempionatında iştirak edirdim. Mənim rəhbərliyim altında komanda cəmi 4 məşqə çıxmışdı. Ona görə oyunun əvvəlində mənimlə oyunçular arasında anlaşma baxımından bir qədər problem var idi. Lakin oyunun gedişatında bu çatışmazlığı aradan qaldırmağı bacardıq. Oyunumuzu stabilləşdirdik və düşünürəm ki, layiqli qələbə qazandıq".

Vitali Stepanovski ("Neftçi"): "Oyuna inamlı başladıq. Basketbolçularımız enerji ilə oynadılar və tapşırıqları yerinə yetirdilər. İlk 15 dəqiqədə hər şey plan üzrə getdi: möhkəm müdafiə və arxa plana nəzarət sayəsində önə keçdik. Lakin 2-ci hissənin sonunda bir sıra səhvlərə yol verdik və intizamı itirdik, rəqib komandanın lideri Hassani Qravett bundan yararlandı. Fasilədən sonra vəziyyət qayda pozuntularına görə pisləşdi. Bu, bizi heyətimizi yenidən qurmağa məcbur etdi. 3-cü hissədə hücum təşkilatçılığımız zəiflədi, çoxlu səhvlərə yol verdik və rəqibə asanlıqla xal qazanmağa şərait yaratdıq. Son hissədə oyunu dəyişməyə çalışdıq və bəzən buna nail olduq. Oyunçuların fədakarlığından məmnunam, lakin onların uzaqdan atışları məyusluq yaratdı. Komandanın yaxşı potensialı var, müdafiəmizi və hücumumuzu yaxşılaşdırmalıyıq. Bunun üzərində işləməyə davam edəcəyik".