Azərbaycan Basketbol Federasiyasının prezidenti Emin Əmrullayev jurnalistlərə müsahibə verib.
Prosport.Az-ın əməkdaşının da iştirak etdiyi müsahibədə Emin Əmrullayev əvvəlcə yeni basketbol mövsümü ilə bağlı danışıb:
– Addım-addım strategiyamıza doğru getməyə çalışırıq. 2030-cu ilə qədər planımız U-16, U-18 yaşlı milli komandalarımızın arzuedilən A divizionunda oynamaları, ən azından B divizionunda yer tutmalarıdır. Bu halda biz milli komandanın və milli basketbolçuların müxtəlif güclü çempionatlarda, eyni zamanda Azərbaycan Basketbol Liqasında daha keyfiyyətli oyunlarından danışa bilərik. Cari mövsüm həlledici rol oynayacaq. Növbəti mövsümdən 6 komandadan 8 komandalı liqaya keçmək istəyirik. Bu bizim əsas liqamız olacaq. Bundan əlavə, daha 6 və ya 8 komandalı I Liqa təşkil olunacaq. Hər il 1 komanda aşağı liqaya düşəcək, digəri yuxarı liqaya vəsiqə qazanacaq. Bizim üçün ən önəmli məqamlardan biri Qadın Basketbol Liqasıdır. Bu il ola bilər ki, mövsümün sonuna qədər 4 komandadan ibarət liqa formalaşsın, buna ümid edirik. Bu həm də sponsorlardan asılıdır. Çalışırıq ki, bu liqa formalaşsın və Qadın Basketbol Liqası müntəzəm olaraq fəaliyyət göstərsin.
– Bu mövsüm A qrupunda 4+1, B qrupunda isə 3+2 limiti tətbiq olunur. Bu nə ilə bağlıdır?
– İstəyirik ki, azərbaycanlı basketbolçular daha çox oynasın. Digər tərəfdən də A qrupunda legionerlərin çox oynadılması daha çox baxımlılığa hesablanıb. Biz istənilən halda ümumi sifariş ərizəsində FIBA-nın 5 yerli + 7 legioner oyunçu olması qaydasına riayət edirik. B qrupundakı 3+2 sistemini isə növbəti mövsüm B Liqasına hazırlıq kimi belə etmişik. Pley-off mərhələsində isə onlar üçün də 4+1 sistemi tətbiq olunacaq. Növbəti mövsüm A Liqasında daha çox legionerlərin, B Liqasında isə yerli basketbolçuların daha çox oynaması nəzərdə tutulub.
– "Abşeron" və "Gəncə"yə yeni sponsor tapıldı. Mövsümün gedişində digər komandalarımıza da yeni sponsorun tapılması mümkündür?
– Bu məsələ ilə bağlı daimi iş gedir. Burada tək sponsor yox, idarəetmə məsələsindən söz gedir. Sponsorlarımıza öz təşəkkürümüzü bildirdik. Gözləntimiz ondan ibarətdir ki, klublar özləri birbaşa sponsor tapsın və biz də idarəetməni onlara təhvil verək. Bu gün hazırda 4 klubun ("Şəki", "Quba", "Lənkəran" və "Sumqayıt"ı nəzərdə tutur) sponsoru yoxdur. Digər 8 komandanın bu və ya digər formada sponsoru mövcuddur. Gələcəkdə klubların nəticələrinə görə maliyyələşmə mexanizmi tətbiq olunacaq.
– Avrokuboklara uğurlu start verildi. Bu mövsüm 3 klubumuzun Avropadakı çıxışı nə vəd edir?
– Nə qədər çox qələbə olsa, federasiya üçün yaxşıdır. Bu, azərbaycanlı azarkeşin idmana şüurlu şəkildə gəlişinə səbəb olacaq. Başqa idman növlərində (futbolu nəzərdə tutur) də görürük ki, daha çox beynəlxalq matçlara tamaşaçı gəlir, anca həmin komandanın yerli çempionatdakı matçına demək olar ki, heç kim gəlmir. Əsas məsələ azarkeşlərin qəlbində basketbola sevginin yaranması, onların matçlara ancaq qələbə üçün gəlməməsidir. Bu, 1-2 ilin işi deyil. Ancaq avrokuboklarda iştirak həm də buna hesablanıb.
– III MDB Oyunlarında 3x3 basketbol millilərimiz çıxış edəcək. Oradan hansı nəticə gözləyirsiniz?
– Bütün beynəlxalq yarışlarda qələbə gözləyirik.