"Abşeron Lions"u təbrik edirəm. Oyun yaxşı başladı, fiziki müdafiədə yaxşı oynadılar".

Prosport.Az xəbər verir ki, bu sözləri Kiprin "Anortosis" basketbol klubunun baş məşqçisi Daniel Nelson Avropa Kubokunun təsnifat mərhələsində Bakıda "Abşeron Lions"a 73:89 hesabı ilə uduzduqları ilk oyundan sonra keçirilən mətbuat konfransında deyib.

İrlandiyalı mütəxəssis Azərbaycan təmsilçisinin növbəti mərhələyə doğru ilk addımı atdığını bildirib: "Müdafiəni yaxşı qurmuşdular. Oyunda geridönüş etmək istədik. Sonlarda yaxşı oynadıq, amma yenə də uduzduq".

O, cavab oyunu üçün ümidsiz olmadığını söyləyib: "Hər zaman qələbəni hədəfləyirik. Basketbol elədir ki, həmişə qələbəni düşünürük. Bu da bir oyundan ibarət deyil. Evdə də sonadək oynayacağıq. Vacib məsələ odur ki, oyunu analiz edəcəyik. Hər zaman qalib gəlməyə çalışıram".

Daniel Nelson komandasında az sayda amerikalı oyunçuların yer almasına isə belə münasibət bildirib: "Mən komandamdakı hər oyunçuya hörmətlə yanaşıram. Onların pasportunun önəmi mənim üçün yoxdur".

Qeyd edək ki, komandalar arasındakı cavab görüşü oktyabrın 1-də Limassolda baş tutacaq.