Avrokuboklarda çıxış edəcək basketbol komandalarımızın müntəzəm mövsümdəki rəqibləri ilə bağlı dəyişiklik olub.
Prosport.Az-ın xəbərinə görə, ilk dəfə ölkəmizi FIBA Çempionlar Liqasının müntəzəm mövsümündə təmsil edəcək "Sabah"ın B qrupunda bütün rəqibləri bilinib.
Belə ki, Çempionlar Liqasının təsnifat mərhələsindən mübarizəyə qoşulmuş Fransanın "Elan" komandası növbəti mərhələyə vəsiqə qazanıb. Şalon-sür-Son təmsilçisi sentyabrın 20-də 1/4 finalda "Friburq Olimpik"i (İsveçrə) 107:80, sentyabrın 22-də yarımfinalda "Portu"nu (Portuqaliya) 100:79 və dünən finalda UKAM-ı (İspaniya) 96:88 məğlub edərək müntəzəm mövsümdə çıxış etmək hüququ əldə edib.
Beləliklə, ölkə çempionumuz "Sabah" B qrupunda "Alba" (Almaniya), ERA (Çexiya) və "Elan"la qarşılaşacaq. İlk turun oyunları oktyabrın 7-də start götürəcək.
İlk dəfə ölkəmizi FIBA Avropa Kubokunda təmsil edəcək "Neftçi"nin I qrupundakı rəqiblərindən olan Türkiyənin "Bursaspor" komandasının da Çempionlar Liqasında çıxış edəcəyi dəqiqləşib. Bursa təmsilçisi "Löven"i (Almaniya) 81:74, PAOK-u (Yunanıstan) 92:73 və "Vindrouz Cayənts"i (Belçika) 77:58 məğlub edib. Beləliklə, "Neftçi"nin Avropa Kubokunun müntəzəm mövsümünün I qrupunda rəqiblərindən yalnız "Kalev/Kramo" (Estoniya) və "Trefl" (Polşa) bəllidir. Estoniya təmsilçisi yarımfinalda Slovakiyanın "Patrioti" komandasına 69:81 uduzduğundan, Çempionlar Liqasında müntəzəm mövsümə vəsiqə qazana bilməyib. "Neftçi"nin 3-cü rəqibi Avropa Kubokunun təsnifat matçları başa çatdıqdan sonra bəlli olacaq.
Dünən avrokuboklarda debüt edən "Abşeron Layəns" isə Avropa Kubokunun təsnifat mərhələsində Kiprin "Anortosis" komandasına 89:73 hesabı ilə qalib gəlməklə müntəzəm mövsümdə çıxış etməyə yaxın olub. Əgər komandamız oktyabrın 1-də Limassolda rəqibini yenə üstələsə və ya 16 xaldan az fərqlə uduzsa, o zaman Avropa Kubokunun müntəzəm mövsümünün H qrupunda çıxış edəcək. Burda isə rəqiblərdən "Kasademont" (İspaniya) və "Falko"nun (Macarıstan) olacağı dəqiqdir. Yalnız Danimarkanın "Baken Beərs" komandası bu gün Çempionlar Liqasının təsnifat mərhələsinin finalında "Patrioti"yə uduzsa, növbəti rəqib də məhz Şimali Avropa təmsilçisi olacaq.