"Sərbəst güləşçi Osman Nurməhəmmədov (92 kq) gələcək yarışlarda daha yüksək əyarlı medallarla Azərbaycanı qürurlandıracaq".

Prosport.Az xəbər verir ki, bunu Azərbaycan Güləş Federasiyasının (AGF) prezidenti Mikayıl Cabbarov "X" sosial şəbəkə hesabında yazıb.

O, Xorvatiyanın paytaxtı Zaqrebdə keçirilən dünya çempionatında bürünc medal qazanan sərbəst güləşçi Osman Nurməhəmmədovu (92 kq) təbrik edib. "Xorvatiyanın Zaqreb şəhərində keçirilən dünya çempionatında güləş üzrə millimiz uğurlarını davam etdirir. Milli komandanın təcrübəli üzvü, sərbəst güləşçimiz Osman Nurmaqomedov (92 kq) bürünc medal qazanıb. Karyerasında 4-cü dəfə dünya çempionatında fəxri kürsüyə qalxan güləşçimizi, məşqçilərimizi və idmançımızın ailə üzvlərini təbrik edirik", - deyə AGF rəhbəri bildirib.

Qeyd edək ki, Azərbaycanın sərbəst güləşçiləri dünya çempionatında 4 medal əldə ediblər. Giorgi Meşvildişvili (125 kq) gümüş, Nürəddin Novruzov (61 kq), Arseniy Djioyev (86 kq) və Osman Nurmaqomedov (92 kq) isə bürünc mükafata sahib çıxıblar.