Ötən mövsüm "Şəki" basketbol klubunun Azərbaycan 3-cüsü olmasında əsas pay sahiblərindən biri komandanın kapitanı Roti Veyr oldu. O, xüsusən XV turdan sonra "Şəki"nin oyunlarında MVP seçilməyə başladı.

Klubun mətbuat xidməti amerikalı basketbolçudan müsahibə götürüb. Prosport.Az həmin müsahibəni təqdim edir:

– Ötən mövsüm barədə hansı düşüncələrə maliksiniz?
– Çox mükəmməl mövsüm keçirdik. Hamı yaxşı oynadı. Düzdür, bəzi zədəlilərimiz, mövsümün ortasında bizdən ayrılanlar oldu. Ancaq qalan oyunçularla bir-birimizi çox yaxşı başa düşdük.

– "Sabah"la yarımfinal matçını saymasaq, hansı komandalarla oyunlar sizin üçün çətin oldu?
– "Gəncə" ilə oyunlarımız çətin keçdi. Onlarla matç zamanı hücumu daha da təkmilləşdirdik. Bəlli proqram üzərində çalışdıq və nəticədə onlara 1/4 finalda qalib gəldik.

– Azərbaycana gəlməmişdən öncə belə çətin oyunlar olacağını, B qrupunda MVP seçiləcəyinizi gözləyirdiniz?
– Bura gəlişimdə məqsəd özümü təkmilləşdirib, yaxşı oyun göstərmək idi. MVP seçiləcəyim barədə isə fikirləşməmişdim. Bizim komandada bu mükafatı haqq edən Kris Barton və Aleks Koldvell kimi basketbolçular da vardı. Onlar komandadan ayrıldıqdan sonra özümü daha da yaxşı tərəfdən göstərməyə başladım.

– Komandada Coş Robinson daha çox çılğınlığı ilə seçilirdisə, siz soyuqqanlı, təmkinli hərəkətləriniz ilə fərqlənirdiniz. Olduqca sakit olmağınız nə ilə bağlıdır?
– Yaşadığım yer Missisipi ştatında Hamilton adlı kiçik qəsəbədir. Şəkidəki kimi, insanların az olduğu yerdir. Orada yaşayan insanlar da təbiətən sakitdir. Görünür, mən də bu səbəbdən beləyəm.

– Baş məşqçi Bedri Meriçlə bağlı fikirləriniz necədir? Oyun vaxtı əsəbi, matçdan sonra sizə qarşı çox yumşaq olurdu...
– O, böyük məşqçidir. Mənə çox güvəndi. 2 əsas oyunçu komandadan ayrıldıqdan sonra məni kapitan seçdi. Oyunlar vaxtı bizə çox yaxşı motivasiya verirdi. Bu da qələbələr qazanmağımızda həlledici rol oynayırdı.

– Şəkini, Azərbaycanı tərk etdiniz. Hansı təəssüratla ayrıldınız?
– Şəki çox sakit yerdir. İnsanları da çox mehribandır. Orada olmağıma çox şad oldum. Gələcəkdə də burada oynamaq istərdim.