Azərbaycan yığması Yunanıstanın paytaxtı Afinada keçirilmiş U-17 dünya çempionatında uğurlu çıxışla yadda qalıb.
Prosport.Az xəbər verir ki, 1 qızıl, 3 bürünc medal qazanan sərbəst güləş üzrə millimiz Vətənə qayıdıb.
Heydər Əliyev Beynəlxalq Aeroportunda komandanın qarşılanma mərasimi keçirilib. Mərasimdən sonra komandanın böyük məşqçisi və uğur qazanmış idmançılar açıqlama veriblər
Əsgərxan Novruzov, böyük məşqçi: “15 ildir ki, bu komandada böyük məşqçiyəm. Deyə bilərəm ki, son illərin ən rəqabətli dünya çempionatlarından biri idi. İran güləş ölkəsi sayılır. Hər zaman qızıl medalları olur. Amma bu dəfə qızıl medal qazana bilmədilər. Bizim çempionumuz oldu. Komanda hesabında III yeri tutmağa cəmi 1 xal çatmadı. Yarışa yaxşı hazırlaşmışdıq. Uşaqlar da hazır idi. Əksər çəkilərdə favorit sayılan ölkələrin idmançılarına məğlub olduq. Bəzi görüşlərdə son saniyələrdə uduzduq. Bəzən idman xoşbəxtliyi də üzümüzə gülmədi. Əks halda, daha çox medal qazana bilərdik. Amma 4 medal da böyük nəticədir. Son 3 ilin ən yaxşı nəticəsidir. Sərbəst güləş üzrə koordinator Hacı Əliyev də bizimlə yarışa səfər etdi. Dünya çempionumuz elə Hacı Əliyevin çəkisində – 65 kq-da oldu. Hacıya bütün komandanın adından təşəkkür edirəm. Bizə hərtərəfli dəstək verdi”.
Hacı Əliyev, sərbəst güləş üzrə koordinator: “Komandamızı, medalçıların şəxsi məşqçilərini, milli komandanın məşqçilərini təbrik edirəm. Federasiyamızın gözü aydın olsun ki, yeniyetmələrimiz dünya çempionatında gözəl uğur əldə etdilər. Avropa ölkələri arasında birinci olduq. Dünya çempionatı çox çətin yarışdır. Burada medal qazanmaq asan deyil. Bu günün çempionları, medalçıları gələcəyin böyüklərdə potensial dünya, olimpiya çempionlarıdır. Əlimizdən gələni edirik ki, bu medalçıları gələcəyə doğru düzgün şəkildə aparaq, yeni-yeni dünya, olimpiya çempionları yetişdirək. Hər zaman əlimdən gələni etməyə hazıram. İnşallah, böyük uğurlara nail olacağıq”.
Hüseyn İsmayılov, dünya çempionu: “Yarış çox yaxşı keçdi. Keçən il söz vermişdim ki, dünya çempionatında gümüşümü qızıla çevirəcəyəm. Şükür Allaha ki, elə də oldu. Əsgərxan müəllimin məşqləri, rejimi sayəsində buna nail olduq. Növbəti hədəfim gənclərdə bu uğurun davamını gətirməkdir. Üzərimdə əziyyəti olan hər kəsə öz təşəkkürümü bildirirəm. Dünya çempionatında bütün görüşlər çətin olur. Amma bütün görüşlərdə inanırdım ki, son xal prinsipiylə də olsa, qazanan mən olacağam. Şükür Allaha ki, elə də oldu”.
Səid Paşayev, dünya üçüncüsü: “Yarışa çempion olmağa getmişdim. Müəyyən səhvlərə görə alınmadı. İnşallah, gələcəkdə səhvləri düzəldib, daha böyük uğurlar əldə edərəm. Yaxın günlərdə gələcək karyeramı sərbəst, yoxsa yunan-Roma güləşində davam etdirəcəyimə qərar verməyi düşünürəm”.
Hakim Tağıyev, dünya üçüncüsü: “Yarış əla keçdi. Bürünc medal qazandım. Daha yüksək nəticə də ola bilərdi. İnşallah, bundan da yaxşı hazırlaşıb, gələn il qızıl medal qazanacağam. Ailəmə, şəxsi məşqçimə və yığma komandanın məşqçilərinə minnətdaram”.