Azərbaycanın tanınmış MMA döyüşçüləri Vüqar Kərəmovla Tofiq Musayev Yaponiya təşkilatı olan "Rizin"də rinqə çıxacaq.

Prosport.Az-ın əldə etdiyi məlumata görə, iyulun 30-da Yaponiyanın Saitama şəhərində keçiriləcək "Super Rizin 2" turnirində hər iki idmançımızın rəqibləri yerli döyüşçülər olacaq.

Vüqar Kərəmov 66 kq çəki dərəcəsində Mikuru Asakira ilə titul döyüşünə çıxacaq. Qalibə yüngül çəkinin kəməri veriləcək.

"Bellator"da çıxış edən Tofiq Musayev isə 2 təşkilatın əməkdaşlığı sayəsində "Rizin" döyüşçüsü Akira Okada ilə qarşılaşacaq. Bu görüş 71 kq çəki dərəcəsində baş tutacaq.

Qeyd edək ki, 31 yaşlı Vüqar Kərəmov son 3 döyüşdür ki, "Rizin"də məğlubedilməzdir. O, 18 qələbə, 4 məğlubiyyət göstəricisinə malikdir. 30 yaşlı Mikuru Asakira da "Rizin"də son 3 görüşdə qalib gəlib. Onun statistikası da 17 qələbə və 3 məğlubiyyətdən ibarədir.

33 yaşlı Tofiq Musayev martın 10-da "Bellator 292" turnirində rusiyalı Aleksandr Şabliyə uduzsa da, indi həmin məğlubiyyəti unutdurmaq üçün Akira Okadanı məğlub etməyə çalışacaq. Tofiqin indiyədək 20 qələbə və 5 məğlubiyyəti var. 36 yaşlı Okada da Musayev kimi əvvəl "Rizin"də döyüşüb. O indiyədək 19 qələbə, 9 məğlubiyyət və 4 heç-heçə göstəricisi ilə yadda qalıb.

Səbuhi Musa