Yunanıstanın paytaxtı Afinada 17 yaşadək (U-17) güləşçilərin dünya çempionatı davam edir.

Prosport.Az xəbər verir ki, daha 2 sərbəst güləşçimiz mundialda fəxri kürsüyə qalxıb.

Hüseyn İsmayılov (65 kq) finalda amerikalı Arseni Kikinyovla qarşılaşıb. Gərgin mübarizə şəraitində keçən görüşdə rəqibinə sonuncu xal prinsipinə əsasən (1:1) qalib gələn həmyerlimiz dünya çempionu olub.

Hakim Tağıyev (110 kq) təsəlliverici görüşdə ermənistanlı Laert Movsesyana heç bir şans tanımayıb – 13:4. Milli üzvü həlledici qarşılaşmada bolqarıstanlı Stefan Stefanova sonuncu xal prinsipinə əsasən (1:1) qalib gələrək bürünc medalı boynundan asıb.

Rəvan Həsənzadə (48 kq) isə 3-cü yer uğrunda görüşdə rusiyalı İslam Rabadanova 9:11 hesabıyla məğlub olub.