23-24 avqustda 3x3 basketbolu üzrə Qadın Seriyasının Qubada baş tutmalı olan 13-cü mərhələsinin məkanı dəyişdirilib.

Prosport.Az-ın xəbərinə görə, yarış ötən ilki kimi Qubada keçirilməyəcək.

Həmin mərhələ Bakının Səbail rayonunda keçiriləcəyindən, mərhələ "Səbail" adlandırılıb. Yarışda 16 komanda iştirak edəcək.

İyulun 27-də X mərhələdə – Sumqayıtda çempion olan yığmamızın potensial rəqibləri artıq məlumdur. Bunlar bu il hamıdan çox – 3 dəfə çempion olmuş Niderland, Çexiya, mayda Bakıda çempion olmuş Latviya, Polşa, Çin, Çili, Benin, Filippin, Monqolustan, Misir, Qazaxıstan yığmalarıdır. Bundan başqa, Niderlandın 25 yaşadək millisi (U-25), eləcə də Rumıniyanın "Rapid", Çinin "Şanxay Redvinqs" və Xorvatiyanın "Zaqreb" komandaları da mübarizə aparacaq.

Millimiz bu mərhələdə oyunçuların keyfiyyətinə görə, Niderland, Çexiya, "Rapid", Latviya, Polşa və Niderland U-25-dən sonra 7-cidir. Komandamız mübarizəyə birbaşa hər qrupda (4 qrup olacaq) 3 komandanın yer aldığı qrup mərhələsindən başlayacaq. Bundan öncə isə ilkin seçmə qrupun (2 qrup olacaq) oyunları keçiriləcək. Seçmə qrup liderləri əsas mərhələdə C və D qrupunda yer alacaq.

Qeyd edək ki, ilk dəfə fevralda bu turnirin mərhələ yarışları elan edilərkən, 23-24 avqustdakı mərhələnin Qəbələdə keçiriləcəyi posterdə əks olunmuşdu.