Serbiyanın Zlatibor şəhərində məktəblilər arasında keçirilən Avropa çempionatında Yusif Ağakişiyevlə serbiyalı rəqibi Viktor Maystroviç arasında final döyüşündə Şimali makedoniyalı hakim Stefan Subalevskiyə hücum çəkərək onu boğmağa çalışan Azərbaycan millisinin özbəkistanlı texniki direktoru Həmzə Əvəzov caliber.az saytının suallarını cavablandırıb.

Prosport.Az həmin müsahibəni təqdim edir:

– Zəhmət olmasa deyin, niyə belə etdiniz? Sadəcə döyüşdən sonra etiraz təqdim etmək olmazdımı?
– 1-cisi, məktəblilər arasında keçirilən Avropa çempionatı kimi yarışlarda rəsmi etiraz proseduru ümumiyyətlə tətbiq olunmur. Bu da belə hakim özbaşınalığına yol açır. Bunu ilk dəfə deyil ki, görürəm. 2-cisi, ən ağrılısı odur ki, bu cür haqsızlıqlar ən çox azərbaycanlı boksçulara qarşı edilir. Yəni, demək olar ki, hər yaş kateqoriyasında favorit olan bizim uşaqlara. Halbuki bu, yeniyetmələrin psixologiyasını məhv edir. Buna görə də özümü saxlaya bilmədim.

– Baş verənlərə görə peşman deyilsiniz? Həmin an nə düşünürdünüz? Axı, sizə ömürlük diskvalifikasiya və ya azı bir neçə illik cəza verilə bilər...
– Yox, həmin an ağlıma heç bir cəza gəlmirdi! Mən yalnız boksçumuzun vəziyyətini düşünürdüm. O hakim idmançının haqqını hər kəsin gözü qarşısında oğurladı, çox ağır psixoloji zərbə vurdu!

– Lakin son 30 ildə boksçularımızdan bir çox qələbə alınsa da, heç bir məşqçi, o cümlədən legioner belə bir addım atmayıb...
– Bilirsiniz, mən indiyə qədər nə olub-olmadığını deyə bilmərəm. Amma inanıram ki, bundan sonra nələrin baş verəcəyini hamı görəcək. Ümid edirəm ki, hakimlər artıq 100 ölçüb, 1 biçəcəklər, yəni, azərbaycanlı boksçulara qarşı belə haqsızlıqlara yol verməyəcəklər. İstərdim ki, başa düşsünlər: bizim uşaqlarla belə davranmaq olmaz! Xüsusilə də bizim boksçular çox güclüdür və istənilən səviyyəli yarışlarda qalib gəlmək potensialına malikdir. Əminəm ki, bu hadisədən sonra hakimlər Azərbaycanla hesablaşmalı olacaq!

– Bəs, indi sizi nə gözləyir?
– Bilmirəm. Yaşayarıq, görərik. Amma baş verənlərə görə peşman deyiləm və əminəm ki, işsiz qalmayacağam.