"Sumqayıtda MVP seçildiyim üçün xoşbəxtəm".

Bunu Prosport.Az-a açıqlamasında qadın basketbol millimizin üzvü Aleksandra Mollenhauer deyib.

Alman əsilli amerikalı legioner 3x3 basketbolu üzrə Qadın Seriyasının Sumqayıt mərhələsinin finalında Latviyaya qalib gəlmələrindən, mayda Bakıda Dünya Kubokunun seçmə mərhələsində və Bakı mərhələsində onlara niyə uduzmalarının səbəbini açıqlayıb:

"Mayda Latviyaya 2 dəfə uduzmağımızın səbəbini daha çox komanda şəklində bir yerdə az vaxt keçirməyimizlə əlaqələndirərdim. Bakıdakı 2 turnir bizim üçün bu baxımdan çətin idi. Birincisi, biz daha çox 5x5 oynamışıq. Ona görə də bir yerdə çox məşq etməmişdik. Amma bu 3 həftəni bir yerdə keçirdik və bu da bizə çox faydalı oldu. Bir-birimizi öyrəndik, bir-birimizlə oynadıq və əvvəlki ritmimizə, tempimizə qayıtdıq".

O, 23-24 avqustda Azərbaycanda keçiriləcək 3x3 basketbolu üzrə Qadın Seriyasının növbəti mərhələsində məqsədi açıqlayıb: "Biz evdə oynayacağıq. Həmişə öz azarkeşlərimiz qarşısında qalib gəlmək istəyirik. Ancaq ən böyük hədəfimiz vəsiqə qazandığımız sentyabrda Danimarkanın paytaxtı Kopenhagendə keçiriləcək Avropa Kubokudur. Avqustda Bakıdakı turnirdən daha çox inkişaf etmək yönündə istifadə etmək istəyirik. Yaxşı işlər gördük. Azərbaycan üçün daha da yaxşı işlər görməliyik".

Qeyd edək ki, məğlubiyyət üzü görməyən yığmamız turnirin 10-cu mərhələsi olan Sumqayıtda Latviyaya finalda 15:12 qalib gəlib. Bununla da komandamız may ayından etibarən start götürmüş Qadın Seriyası turnirində 1-dən artıq çempion olmağı bacaran 3 komanda arasına (digərləri 3x3 basketbolunda Avropa nəhəngləri Niderland və İspaniyadır) düşüb.

Səbuhi Musa