3x3 qadın basketbol millimiz Qadın Seriyasının Azərbaycanda təşkil olunmuş 10-cu – Sumqayıt mərhələsində hamıdan güclü olub.

Prosport.Az-ın Sumqayıta ezam olunmuş əməkdaşı xəbər verir ki, millimiz bu il 2 dəfə Bakıda (turnirin Sea Breeze mərhələsi və Dünya Kubokunun seçmə mərhələsi) uduzduğu Latviyanı finalda 15:12 məğlub edərək çempion olub.

Sumqayıt mərhələsinin ən dəyərli oyunçusu (MVP) çempion millimizin üzvü Aleksandra Mollenhauer seçilib.

Yarışın sonunda Arika Karter, Aleksandra Mollenhauer, Brianna Freyzer və Dina Ulyanovadan ibarət olan millimizin heyət üzvləri çempionluğu bayram edib və xatirə şəkilləri çəkdirib. Sumqayıt şəhər icra hakimiyyətinin başçısı Zakir Fərəcov komandaya vaza bağışlayıb.

Turniri izləyənlər arasında Azərbaycan Basketbol Federasiyasının prezidenti, elm və təhsil naziri Emin Əmrullayev və qızı da olub.

Qeyd edək ki, bu, qadın millimizin bu ay bu turnirdə 2-ci qələbəsi olub. Komandamız daha əvvəl iyulun 13-də Rumıniyanın paytaxtı Buxarestdə keçirilən mərhələ yarışında ABŞ-nin "Sietl 3XBA" komandasına 21:18 hesabı ilə qalib gələrək çempion adına yiyələnmişdi. Komandamız bu nəticə ilə Niderland (3) və İspaniya (2) kimi 1-dən artıq çempion olan komandalara qoşulub. 

19:19

3x3 basketbolu üzrə qadın millimiz Sumqayıtda keçirilən Qadın Seriyası turnirində finala çıxıb 

Prosport.Az-ın Sumqayıta ezam olunmuş əməkdaşının xəbərinə görə, komandamız yarımfinalda Rumıniyanın “Rapid” komandasına 21:15 hesabı ilə qalib gəlib.

Komandamız bu gün finalda Latviya – Fransa cütünün qalibi ilə qarşılaşacaq 

16:49

3x3 basketbolu üzrə qadın millimiz Sumqayıtda keçirilən Qadın Seriyası turnirində yarımfinala çıxıb.

Prosport.Az-ın Sumqayıta ezam olunmuş əməkdaşının xəbərinə görə, millimiz turnirin reytinqcə 3-cü komandası olan Çinə qalib gəlib – 18:12.

Qeyd edək ki, komandamız saat 17:55-də finala çıxmaq üçün“Pekin”ə (Çin) qalib gələn “Rapid”lə (Rumlniya) qarşılaşacaq.