Macarıstanın paytaxtı Budapeştdə reytinq turniri sona yaxınlaşır.
Prosport.Az xəbər verir ki, yarışın 3-cü günündə yunan-Roma güləşi üzrə millinin 5 üzvü xalçaya çıxıb.
72 kq
Ruslan Nurullayev qazaxıstanlı Daniyar Kalenova 5:1 hesabıyla qalib gəlsə də, 1/4 finalda gürcüstanlı Yuri Lomadzeyə müqavimət göstərə bilməyib – 0:10. Təsəlliverici görüşdə norveçli Juan Aakı (6:4) yolundan kənarlaşdıran Ruslan bürünc medal uğrunda qarşılaşmada gürcüstanlı Giorgi Çxikvadzeyə heç bir şans tanımayıb – 9:0.
Gücünü yuxarı çəkidə sınayan olimpiya və dünya mükafatçısı, üçqat Avropa çempionumuz Həsrət Cəfərov yarımfinaladək Serbiyanı təmsil edən dünya çempionu Ali Arsalanla (2:1) qazaxıstanlı Merey Maulitkanova (5:3) qalib gəlib. Özbəkistanlı Abdulla Aliyevə 3:5 hesabıyla məğlub olan Həsrət biləyindəki zədəyə görə 3-cü yer uğrunda görüşə çıxmayıb.
87 kq
İslam Abbasov ilk mərhələdə macarıstanlı İştvan Takaçı 3:1 hesabıyla üstələyib. 1/8 final görüşü erkən başa çatıb. Niderlandlı Marsel Sterkenburq zədələndiyi üçün İslam növbəti mərhələyə adlayıb. Norveçli Eksos Mukubunu ilk xal prinsipinə əsasən (1:1) mübarizədən kənarlaşdıran Abbasov yarımfinalda macarıstanlı David Loşonçiyə uduzub – 0:4. İslam bürünc medal uğrunda görüşdə serbiyalı Avropa çempionu Aleksandr Komarovdan güclü olub – 5:2.
130 kq
Beka Kandelaki koreyalı Seunq-çan Liyə tam üstünlüklə (9:0) qalib gəlsə də, 1/4 finalda macarıstanlı Dariuş Vittekə sonuncu xal prinsipinə əsasən (3:3) məğlub olubsa, zədələndiyi üçün macarıstanlı Koppani Laslöylə təsəlliverici görüşə çıxmayıb.
Onunla eyni çəkidə yer alan Sərxan Məmmədov ABŞ güləşçilərini – Aden Attao (9:0) və Körtni Frimanı (4:3) mübarizədən kənarlaşdıraraq yarımfinala yüksəlib. Finalın bir addımlığında macarıstanlı Dariuş Vittekə “tuş”la məğlub olan Sərxan bürünc medal uğrunda görüşdə macarıstanlı Koppani Laslöyə minimal fərqlə (1:2) uduzub.
Beləliklə, yunan-Roma güləşçilərimiz reytinq turnirinə 2 bürünc medalla start verib.
Xatırladaq ki, sərbəst güləş millimiz turniri 5 medalla tamamlayıb. Arseni Cioyev (86 kq) qızıl, İslam Bazarqanov (57 kq), Əli Rəhimzadə (65 kq), Məhəmməd-Bəşir Xaniyev (74 kq) gümüş və Əbubəkr Abakarov (92 kq) bürünc medal qazanıb. Yığmamız 100 xalla komanda hesabında 3-cü yeri tutub. Millimiz Gürcüstandan cəmi 5, ABŞ-dan isə 2 xal geri qalıb.