"Qarabağ"ın 17 yaşadək komandası (U-17) İsveçin Yötebori şəhərində keçirilən "Gothia Puma Trophy" turnirində növbəti oyununu keçirib.

Prosport.Az-ın İsveçə ezam olunmuş əməkdaşı xəbər verir ki, Rəşad Sadiqovun baş məşqçisi olduğu komanda ötən il bu turnirdə çempion olmuş Nigeriyanın "Sportinq" komandası ilə qarşılaşıb.

Güclü rəqiblə oyunda hesab açılmayıb. 4-cü qrupun digər qarşılaşmasında İsveç komandaları üz-üzə gəlib. Meydan sahibi "Yötebori" (Göteborg) "Myelbi"yə 2:1 qalib gəlib.

Beləliklə, "Qarabağ" və "Sportinq" 4 xalla qrupda ilk 2 sıranı bölüşür. Hər 2 komandanın müsbət top fərqi 2:1-dir. "Yötebori" 3 xalla 3-cü, "Myelbi" 0 xalla sonuncudur. Komandamız sabah Bakı vaxtı ilə saat 12:00-da "Yötebori" ilə qarşılaşacaq. Matç "Yötebori"nin turnir boyu keçirdiyi "SKF Arena"da baş tutacaq.

Xatırladaq ki, komandamız dünən "Myelbi" üzərində əzmkar qələbə qazanıb. Ule Nilson Lööv 10-cu dəqiqədə hesabı açsa da, Əli Əliyevin 17 və 53-cü dəqiqələrdə vurduğu qol komandaya qələbə qazandırıb.