İtaliyanın Kaorle şəhərində keçirilən U-20 Avropa çempionatında 2 qızıl medal qazanan qız güləşi üzrə millimiz vətənə qayıdıb.

Prosport.Az xəbər verir ki, Heydər Əliyev Beynəlxalq Aeroportunda komandanın qarşılanma mərasimi və brifinq təşkil edilib.

Toğrul Əsgərov (baş məşqçi əvəzi): “Öncə bizə belə qələbə sevinci yaşatdıqları üçün idmançılarımızı təbrik edirəm. Əllərindən gələni etdilər. Buna hamı şahid oldu. Federasiyaya da dərin təşəkkürümü bildirirəm. İdmançılarımız üçün nə lazımdırsa, artıqlaması ilə edirlər. Yolumuz Olimpiada yoludur. Bu yolda dayanmaq yoxdur. Bundan qabaqkı müsahibələrimizdə də bildirmişdik ki, komandamız gəncdir, yolumuz uzundur, açıqdır və parlaqdır. Qarşıda bizi U-20 və böyüklərin dünya çempionatları gözləyir. Vaxtımız çox azdır. Əlimizdən nə gəlirsə, onu artıqlaması ilə etməyə çalışacağıq”.

Rövşən Umudov (böyük məşqçi): “Qadın güləşi inkişafdadır. Federasiyanın rəhbərliyinin bu gün qadın güləşinə göstərdiyi qayğı nəticəsində bu inkişaf gələcək yarışlarda daha da özünü göstərəcək. Yeniyetmə qızlar yetişir. Mənə elə gəlir ki, az bir zamanda tam heyətlə yarışlara qatıla biləcəyik. Qadın güləşi öz sözünü deyəcək. Necə ki, sərbəst və yunan-Roma güləşində komanda hesabında Avropa çempionatında ön sıralarda yer alırıq, qadın güləşi üzrə komandamız da 1-2 ilə U-17 və U-20 yaş qrupunda öz sözünü deyəcək”.

Günay Qurbanova (Avropa çempionu): “Yarış çox yaxşı keçdi. Şükür Allaha, bu il 2-ci dəfə Avropa çempionu ola bildim. Çox xoşbəxtəm. Bütün məşqçilər korpusuna, federasiya rəhbərliyinə təşəkkürümü bildirirəm. Növbəti hədəfim U-20 dünya çempionatında uğurlu çıxış etməkdir. Bu yarışa hazırlaşacağıq. İnşallah, yaxşı olacaq”.

Ruzanna Məmmədova (Avropa çempionu): “Yarış olduqca çətin keçdi. Çox güclü rəqiblərlə qarşılaşdıq. Amma şükür Allaha ki, nəticə istədiyimiz kimi oldu. Zədəyə görə son təlim-məşq toplantısında iştirak edə bilmədim. İştirak etsəydim, yarış daha asan keçə bilərdi. Yenə də qalib gəldim. Buna görə də çox sevinirəm. Növbəti hədəfim ilk öncə qarşıdan gələn gənclər arasında dünya çempionatı, sonra U-23 dünya çempionatıdır. Amma əsas hədəf Olimpiadaya lisenziya qazanıb, ölkəmizi layiqincə təmsil etməkdir”.

Qeyd edək ki, qız millimiz Avropa çempionatını 56 xalla 6-cı sırada bitirib.