İtaliyanın Kaorle şəhərində keçirilən U-20 Avropa çempionatında Azərbaycanın 1 sərbəst güləşçisi qızıl, 1-i gümüş medal qazanıb.

Prosport.Az xəbər verir ki, Vasif Bağırov (57 kq) finalda gürcüstanlı Nika Zanqaladzeylə gərgin mübarizə şəraitində keçən görüşdə əzmkar qələbə qazanıb. İlk hissəni 5:6 hesabı ilə geridə başa vuran Gəncə güləş məktəbinin yetirməsi fasilədən sonra üstünlüyünü təmin edib – 9:6. Beləliklə, ötən il U-20 Avropa çempionatında gümüş medal qazanan Bağırov bu dəfə çempion olub.

Muradxan Omarov (79 kq) da həlledici görüşdə Gürcüstan təmsilçisi ilə qarşılaşıb. Ancaq debütant komanda yoldaşından fərqli olaraq, qələbə qazana bilməyib. Şamaxı güləş məktəbinin yetirməsi Davit Çetçelaşviliylə bacarmayıb – 0:10. Beləliklə, Omarov gümüş medalı boynundan asıb.

Rəvan Musayev (97 kq) təsəlliverici görüşdə macarıstanlı Peter Şivnovskiyə 7:0 hesabıyla qalib gəlsə də, bürünc medal uğrunda qarşılaşmada rusiyalı Məhəmmədhacı Məhəmmədova məğlub olub – 0:6.

Qeyd edək ki, Bəşir Verdiyev (61 kq), Omar Gülməmmədov (74 kq), Məhəmməd Abbaszadə (86 kq) və Anar Cəfərli (92 kq) bu gün 3-cü yer uğrunda mübarizə aparacaq. Yusif Dursunov (125 kq) 2-ci dəfə U-20 Avropa çempionatının finalına adlayıb. Həmyerlimiz həlledici qarşılaşmada rusiyalı İnal Qaqloyevlə üz-üzə gələcək.