Oğlanlardan ibarət basketbol üzrə 16 yaşadək millimiz (U-16) Avropa çempionatının C divizionuna qələbə ilə başlayıb.

Prosport.Az xəbər verir ki, təmsilçimiz Albaniyada təşkil olunan turnirin B qrupundakı ilk görüşündə San-Marino yığmasını məğlub edib.

Matç millimizin 105:60 hesablı qələbəsi ilə yekunlaşıb. Azərbaycan yığması qrupda növbəti oyununu bu gün Andorraya qarşı keçirəcək.

Qızlardan ibarət U-18 millimiz isə ilk dəfə iştirak etdiyi Avropa çempionatının B divizionunda keçirdiyi 2-ci oyununda uduzub. Yığmamız Ukraynaya məğlub olub – 65:78.

Təmsilçimiz qrupda növbəti matçını bu gün turnirin təşkilatçısı Litva yığmasına qarşı keçirəcək. Matç Bakı vaxtı ilə saat 19:00-da başlayacaq.

Qeyd edək ki, U-18 qız millimiz qrupdakı ilk oyununda Bosniya və Herseqovina yığması üzərində 83:81 hesablı qələbə qazanmışdı.