“Püşkatma ilə bağlı hansısa illüziyalar qurmurduq, rəqibləri güclü və zəiflərə bölmürdük".

Prosport.Az xəbər verir ki, bu sözləri "Sabah" basketbol komandasının baş məşqçisi Rimas Kurtinaytis deyib.

O, turnirin müntəzəm mövsümündə B qrupunda qarşılaşacaqları rəqibləri dəyərləndirib: "Alba” 24 illik fasilədən sonra yenidən FIBA bayrağı altında çıxış edəcək. Bu komanda uzun illər Avroliqanın daimi sakini olub. Səviyyəsi bəllidir. Məncə, turniri qazanmağa favorit komandalardan biridir".

Litvalı mütəxəssis Çexiya təmsilçisi “Nimburk” haqqında da danışıb: "Bu komanda daha öncə FIBA Avropa Kubokunda “Sabah”ın rəqibi olub. İntizamlı, heyəti keyfiyyətli basketbolçulardan ibarət kollektivdir. Ötən mövsüm Çempionlar Liqasında 1/4 finala kimi irəliləyiblər. Təsnifat mərhələsində yer alan potensial rəqiblərimiz arasında da yaxşı komandalar var. Mən Fransa təmsilçisi “Şole”də oyunçu kimi çıxış etmişəm. Bir sözlə, Çempionlar Liqasında zəif rəqib yoxdur. Bizim rəqabətə davamlı heyətimiz formalaşır. Bu komandalarla mübarizə apara bilərik”.

Qeyd edək ki, püşkatmanın nəticələrinə əsasən, Bakı klubu B qrupunda "Nimburk" (Çexiya), "Alba" (Almaniya) və təsnifat mərhələsindən gələcək komanda ilə qarşılaşacaq. Çempionlar Liqasının müntəzəm mövsümünə oktyabrın 7-də start veriləcək.