İyunun 26-dan 29-dək Türkiyənin Kocaeli şəhərində Yaşar Doğu, Vehbi Əmrə və Hamit Kaplanın xatirə turniri keçiriləcək.

Prosport.Az xəbər verir ki, ənənəvi yarışda hər 3 güləş növü üzrə milli komandanın üzvləri iştirak edəcək.

Yunan-Roma güləşi üzrə komandanın məşqçisi Elvin Mürsəliyevin rəhbərliyi altında Nihad Quluzadə (60 kq), Məhəmməd Şükürzadə (67 kq), Laçın Vəliyev və Cocu Səmədov (hər ikisi 87 kq), qadın güləşi üzrə milli komandanın böyük məşqçisi Ağahüseyn Mustafayevin rəhbərliyi altında Əsmər Cankurtaran (50 kq), Elnurə Məmmədova (53 kq), Nərgiz Səmədova, Gültəkin Şirinova (hər ikisi 55 kq) və Birgül Soltanova (62 kq), sərbəst güləş üzrə məşqçi Taymuraz Kokoyevin rəhbərliyi altında isə Fərid Cabbarov, Cəbrayıl Hacıyev, Səbuhi Əmiraslanov (hamısı 79 kq), Ali Tsokayev (86 kq), Sadiq Mustafazadə (92 kq), Zəfər Əliyev (97 kq) və Xetaq Karsanov (125 kq) mübarizə aparacaq.

Görüşlər hər gün Bakı vaxtı ilə 12:00-da, medallar uğrunda qarşılaşmalar isə 18:30-da başlayacaq.

Turnirdə beynəlxalq dərəcəli hakimlərimiz Elgün Məmmədov və Samil Fəttayev ədaləti qoruyacaq.