Azərbaycanın ilk dəfə ev sahibliyi etdiyi UFC turnirində yeni rekord qeydə alınıb.

Prosport.Az xəbər verir ki, Bakı Kristal Zalında təşkil olunan turnirdə döyüşlər ümumilikdə 2 saat 53 dəqiqə 52 saniyə davam edib. Bu, UFC tarixinə ən uzun döyüş gecəsi kimi düşüb.

Qeyd edək ki, turnirdə 12 döyüş baş tutub. Əsas döyüşlər yüngül çəkidə Azərbaycan idmançısı Rafael Fiziyevlə çilili İqnasio Baamondes və yarımağır çəkidə ABŞ təmsilçiləri Camaal Hill ilə Xalil Rauntri arasında olub. Bu döyüşlərdən Rafael Fiziyev və Xalil Rauntri qalib ayrılıb.

Azərbaycanın digər təmsilçisi Nazim Sadıxov braziliyalı Nikolas Mottanı nokautla məğlub edib. Yüngül çəkidə mübarizə aparan digər idmançımız Tofiq Musayev isə qırğızıstanlı Mıktıbek Orolbaya məğlub olub.

Yarışda, həmçinin Məhəmməd Usman (Nigeriya), Tahir Ulanbekov (Rusiya), Klaudia Sıquva (Polşa), Darya Jeleznyakova (Rusiya), Park Cun-yonq, Ko Seok-hyun (hər ikisi Cənubi Koreya), Məhəmməd Naimov (Tacikistan) və Körtis Bleyds (ABŞ) qələbə qazanıb.

UFC-nin növbəti turniri iyunun 29-da ABŞ-nin Las-Veqas şəhərində təşkil olunacaq.