Mütləq Döyüş Çempionatının (UFC) Bakıda keçirilən turnirində qırğızıstanlı Mıktıbek Orolbayla dueldən məğlub ayrılan Azərbaycan təmsilçisi Tofis Musayev sosial şəbəkə hesabında fikirlərini bölüşüb.

Prosport.Az xəbər verir ki, 35 yaşlı idmançı ona dəstək verən azarkeşlərə təşəkkür edib.

MMA döyüşçüsü növbəti qarşılaşmalarda daha güclü və inamlı olacağını yazıb: "Bəzən qalxırsan, bəzən isə yıxılırsan. Amma əsas olan ayağa qalxmağı bacarmaqdır. Bu dəfə qələbə qismət olmadı. İnsan çox çalışır və inanır, amma həyat bizə fərqli sınaqlar təqdim edir. Bu yol tək gedilmir. Mənimlə gecə-gündüz təlim meydanlarında nəfəs-nəfəsə çalışan komanda yoldaşlarım, hər səhər motivasiya verən məşqçi heyəti, siz mənim üçün sadəcə yoldaş deyilsiniz, bu mübarizənin bir parçasısınız".

Musayev azarkeşlərə də müraciət edib: "Sizin səsiniz, arenada yüksələn o çağırışlar, adımı səsləyən minlərlə insan, dəstəyinizi eşitdim, hiss etdim. Bəzən bir döyüşdə məğlub ola bilərik, amma belə sevgini uduzmaq mümkün deyil. Bu, son deyil. Mən geri dönəcəyəm. Daha güclü, daha möhkəm, daha inamlı. Hamınıza təşəkkür edirəm".

Qeyd edək ki, turnirin əsas görüşündə ABŞ təmsilçiləri Camaal Hill və Xalil Rauntri üz-üzə gəlib. Yarımağır çəkidə baş tutan qarşılaşma 5 raund davam edib. Xalil Rauntri yekunda qalib elan olunub.

Azərbaycan idmançılarından Nazim Sadıxov braziliyalı Nikolas Mottaya, Rafael Fiziyev Çilidən olan İqnasio Baamondesə qalib gəlib.