"Rusiyadan olan çox idmançılar müharibəni dəstəklədiyindən, hesab edirəm ki, Ümumdünya Güləş Birliyinin (UWW) verdiyi qərar düzgün deyil".

Bunu Prosport.Az-a açıqlamasında Azərbaycanın qadın güləşçisi Mariya Stadnik bildirib.

34 yaşlı Ukrayna əsilli güləşçi bildirib ki, UWW-nin 3 apreldə rusiyalı və belaruslu idmançıların neytral bayraq altında yarışa buraxılması barədə qərarı yanlışdır: "Biz bilirik ki, idmanın fəlsəfəsi sülh və dostluğu təlqin edir. Ancaq rusiyalı idmançılar Ukraynaya qarşı təcavüzdə dövlətlərinin yanında olduqlarını bildirirlər.

Əksər rusiyalı güləşçilər açıq şəkildə bildiriblər ki, Ukraynada baş verənləri və onların prezidentinin (Vladimir Putini nəzərdə tutur – S.M.) apardığı xarici siyasəti dəstəkləyirlər. Bundan sonra onların yarışa buraxılması nə dərəcədə düzgün addım ola bilər ki?!"

Qeyd edək ki, Mariya Stadnik bu ay Xorvatiyanın paytaxtı Zaqrebdə keçiriləcək Avropa çempionatında öz çəki dərəcəsində 9-cu dəfə qitənin ən güclüsü olmaq üçün yarışacaq.

Xatırladaq ki, daha əvvəl qadın güləş millimizin sabiq Ukrayna əsilli güləşçisi Tatyana Omelçenko UWW-ni bu qərarına görə sərt tənqid etmişdi.

Səbuhi Musa