AFFA U-17 Liqasında 2024/2025-ci illər mövsümünün qalibləri mükafatlandırılıb.

Prosport.Az xəbər verir ki, Neftçi Futbol Mərkəzində təşkil edilən tədbirdən əvvəl keçirilən sonuncu – 45-ci turun axırıncı oyunlarında “Neftçi” “Turan Tovuz”u 6:0, “Qarabağ” isə “Səbail”i 8:0 hesabı ilə məğlub edib. Bununla da “Neftçi” 109 xalla mövsümü çempion, “Qarabağ” isə 108 xalla 2-ci pillədə başa vurub.

Matçların ardından mükafatlandırma mərasimi baş tutub. Çempionatda 3-cü yeri tutan “Zirə” bürünc, 2-ci pillənin sahibi “Qarabağ” gümüş medallarla təltif olunub. Çempion “Neftçi”yə isə qızıl medallar və kubok təqdim edilib.

Həmçinin fərdi nominasiyalar üzrə qaliblər bəlli olub. Son turda het-trikə imza ataraq ümumi qol sayını 61-ə çatdıran “Qarabağ”ın futbolçusu Əli İbrahim ən məhsuldar oyunçuya verilən mükafatın sahibi olub. İştirakçı komandalar arasında keçirilmiş sorğuya və 18 yaşadək futbolçulardan ibarət Azərbaycan millisinin (U-18) baş məşqçisinin rəyinə əsasən, mövsümün ən yaxşı oyunçusu isə “Qarabağ”ın digər üzvü Əli Qazıbəyov seçilib.

Mükafatlandırma mərasimində AFFA-nın Yarışların Təşkili Departamentinin rəhbəri Emin Cəfərov və U-18 millimizin baş məşqçisi İlham Yadullayev iştirak edib.

Maraqlıdır ki, bu yaş qrupu ötən mövsüm U-16 Liqasında da yarışarkən "Neftçi" çempion, "Qarabağ" 2-ci, "Zirə" isə 3-cü olmuşdu.