U-17 Avropa çempionatında 5 medal qazanan yunan-Roma güləşi üzrə millimiz vətənə qayıdıb.
Prosport.Az xəbər verir ki, komanda hesabında Avropa üçüncüsü olan yığmamız üçün Heydər Əliyev Beynəlxalq Aeroportunda qarşılanma mərasimi keçirilib.
Yığmanın böyük məşqçisi Taleh İsrafilov yarışın çox yaxşı keçdiyini bildirib: "Müəyyən çətinliklər var idi. Şükür Allaha, öhdəsindən gəldik. Medalların əyarına görə, ən yaxşı nəticə göstərən ölkələr sırasında yer aldıq. Komandanın yarısı medal qazandı. Federasiya rəhbərliyilə məsləhətləşdikdən sonra dünya çempionatının hazırlıq planını quracağıq”.
Avropa çempionu Rihad İbrahimli də təəssüratlarını bölüşüb: “Şükür Allaha, çempion oldum. Belarus və Polşa güləşçilərinə qalib gələrək yarımfinala yüksəldim. Ən çətin görüşüm yarımfinalda oldu. Ukraynalı rəqibimi 4:1 hesabıyla üstələdim. Finalda isə bolqarıstanlı güləşçini “tuş”la məğlub etdim. Dünya çempionatında da qızıl medal qazanmağı hədəfləmişəm. İnşallah, yaxşı məşq edib, buna nail olacağıq”.
Digər qızıl medalçı Abdurrahman Hüseynli isə bunları deyib: “Çox güclü yarış idi. Bütün rəqiblərim üzərində böyükhesablı qələbə qazandım və bayrağımızı dalğalandırdım. Rəqiblərimdən yaşca kiçik olsam da, çempion olacağıma inanırdım. Çünki çox yüksək səviyyədə hazırlıq keçmişdik. Bundan sonraki hədəflərim qarşıdan gələn U15 Avropa və U17 dünya çempionatlarında da yüksək nəticə göstərməkdir”.
Avropa ikincisi olan Əli Nəzərovun sözlərinə görə, finala kimi hər şey yaxşı getdi: "Əslində finalda da qalib gələ bilərdim. Öz səhvlərimdən qələbəni əldən verdim. İnşallah, bu səhvləri dünya çempionatında təkrarlamaram”.
Qitə çempionatının bürünc medalçısı Qurban Məcnunov güclü rəqiblərlə qarşılaşdığını etiraf edib: "Görüşlər xala-xal prinsipiylə keçdi. Yaxşı mübarizə apardım. Ancaq yarımfinalda istənilən səviyyədə güləşmədim. İnşallah, dünya çempionatında daha yüksək nəticə göstərərəm. Ona qədər isə U15 Avropa çempionatında 52 kq-da güləşməyi planlaşdırıram”.
Digər Avropa üçüncüsü Nicat Yeylaqaliyev isə çıxışının yaxşı alındığını vurğulayıb: “Yaxşı yarış keçdi. Əslində finala çıxa, hətta çempion da ola bilərdim. İnşallah, bu arzumu dünya çempionatında reallaşdıraram”.
