"Qarabağ"ın 14 yaşadək komandası (U-14) AFFA U-14 Liqasının çempionu olub.

Prosport.Az-ın xəbərinə görə, 3-cü yerin sahibi "Qəbələ"ni 7:2 məğlub edən "Sabah" olub.

Samir Musayevin baş məşqçisi, Maksim Medvedevin köməkçisi olduğu "Qarabağ" isə Gənclər və İdman Nazirliyinə məxsus "Ulduz" Futbol Akademiyası ilə qarşılaşıb. "Qarabağ" 1/8 finalda "Vətən"i, 1/4 finalda "Neftçi" PFK-nı və yarımfinalda "Sabah"ı turnirdən kənarlaşdırmışdı. "Ulduz" isə müvafiq olaraq "Amasiya", "Şamaxı" və "Qəbələ"ni məğlub etmişdi.

"Qarabağ" bu komandaya müntəzəm çempionatda 2 dəfə (1:2, 0:2) uduzmuşdu. Ancaq tərəflərin həlledici oyununda – finalda İbrahim Rzanın son dəqiqələrdə vurduğu yeganə qolla "köhlən atlar" qisas almağı bacarıb – 1:0.

Bu, Maksim Medvedevin məşqçi kimi debüt mövsümündə ilk çempionluğu olub. Onun oğulları – Miroslav və Daniil Medvedevlər isə ardıcıl 2-ci dəfə ölkə çempionluğunu qazanıb.

"Amasiya" komandasının futbolçusu İlham Qubadov vurduğu 38 qola görə bombardir mükafatına layiq görülüb. Hazırda I Liqaya vəsiqə qazanmış "Şahdağ Qusar"ın kapitanı Rahid Əmirquliyevin oğlu Ramil Əmirquliyev isə U-18 millimizin baş məşqçisi İlham Yadullayevin qərarına əsasən turnirin oyunçusu seçilib.

Qeyd edək ki, bu, cari mövsüm "Qarabağ" Akademiyasının ilk çempionluğudur.