AFFA Gənclər Liqasında 2024/2025-ci illər mövsümünün qalibləri mükafatlandırılıb.

Prosport.Az xəbər verir ki, “ASK Arena”da təşkil edilən tədbirdən əvvəl keçirilən son turun oyununda “Qəbələ” “Sabah”ı 5:1 hesabı ilə məğlub edib.

Ardından mükafatlandırma mərasimi baş tutub. Çempionatda 3-cü yeri tutan “Qarabağ” bürünc, 2-ci pillənin sahibi “Qəbələ” gümüş medallarla təltif olunub. Çempion “Sabah”a isə qızıl medallar və kubok təqdim edilib.

Həmçinin fərdi nominasiyalar üzrə qaliblər bəlli olub. Son turda “poker”ə imza ataraq ümumi qol sayını 45-ə çatdıran və bombardirlər yarışında ilk pilləyə yüksələn “Qəbələ”nin futbolçusu Rəvan Əsədov ən məhsuldar oyunçuya verilən mükafatın sahibi olub. İştirakçı komandalar arasında keçirilmiş sorğuya və 19 yaşadək futbolçulardan ibarət Azərbaycan millisinin baş məşqçisi Elxan Abdullayevin rəyinə əsasən, mövsümün ən yaxşı oyunçusu isə “Qarabağ”ın üzvü Hikmət Cəbrayılzadə seçilib. O, ötən mövsüm U-17 Liqasında da ən yaxşı futbolçu seçilmişdi.

Mükafatlandırma mərasimində AFFA Məşqçilər Komitəsinin sədri Vaqif Sadıqov və AFFA-nın Yarışların Təşkili Departamentinin rəhbəri Emin Cəfərov iştirak edib.

Ən maraqlısı budur ki, çempionata iyunun 4 və 5-də keçiriləcək matçlarla yekun vurulacaq. Mükafatçılar bu matçın nəticəsindən asılı olmayaraq, dəyişməyəcək. Ancaq "Qarabağ"ın hücumçusu Davud Mənsumov iyunun 5-də "Zirə"yə 17 qol vura bilsə, bombardirlər cədvəlində lider olacaq. Sual doğur: belə olan halda "Qəbələ"nin futbolçusu Rəvan Əsədovdan həmin mükafat geri alınacaq?