Bu gün Bakıda 3x3 basketbolu üzrə Qadın Seriyasının IV mərhələsinə start veriləcək. Yarışda millimizdən başqa, 15 komanda mübarizə aparacaq. Bunlardan 3-ü klublardır.

Filippin, Madaqaskar, Misir millilərinin, eləcə də Çexiyanın "Praqa" komandasının bu yarışa Beynəlxalq Basketbol Federasiyası (FIBA) tərəfindən dəvət edildiyi bəllidir. FIBA-nın saytında Yaponiyanın "Takasaki" komandasının isə Azərbaycan Basketbol Federasiyası (ABF) tərəfindən dəvət edildiyi göstərilir.

Bəs ABF niyə məhz yaponları bura dəvət edib? Prosport.Az bu məsələni araşdırarkən məlum olub ki, "Takasaki"yə də FIBA tərəfindən Bakıdakı yarış üçün dəvət göndərilib.

ABF-in icraçı vitse-prezidenti Fərrux Mahmudovu dinləyək: "Biz FIBA-ya demişdik ki, Azərbaycandan heç bir klub Qadın Seriyası turnirində iştirak etməyəcək. Kimi istəsəniz, bura dəvət edə bilərsiniz. FIBA da Yaponiyanın belə bir klubunun yarışmaq istədiyini bildirdi. Böyük ehtimalla, onlar 1-ci müraciət etmişdi. Biz də yaponların gəlişinə narazılıq bildirmədik".

Qeyd edək ki, yarış 26-27 may tarixlərində "Sea Breeze"də keçiriləcək. İştirakçı sayı çox olduğundan, əvvəlcə seçmə qrup matçları (saat 13:15-də Madaqaskar – Rumıniya matçı ilə günə start veriləcək) keçiriləcək. Bu qruplardan 2 komanda əsas qrup mərhələsinə vəsiqə qazanacaq. Millimiz isə əsas qrup mərhələsində – A qrupunda turnirin reytinq favoriti Niderland yığması və "Praqa" ilə birgə mübarizə aparacaq. Komandamız ilk oyununu saat 16:00-da Niderlanda və 17:50-də Çexiya klubuna qarşı keçirəcək.