Basketbolun 3x3 növü üzrə Dünya Kubokunun Bakıda (Sea Breeze) keçirilən seçmə mərhələsi yığma komandalarımız üçün uğursuz olub.

Prosport.Az xəbər verir ki, kişilərin yarışında Orxan Aydın, Amil Həmzəyev, Nəzər Quliyev və Kamran Məmmədovdam ibarət yığmamız Kanadaya 7:12 və Böyük Britaniyaya 12:21 hesabla uduzub. Bununla da Zaur Paşayevin baş məşqçisi olduğu komandamız qrup sonuncusu olaraq pley-offdan kənarda qalıb.

Dina Ulyanova, Aleksandra Molenhauer, Arika Karter və Briana Freyzerin yer aldığı qadın millimiz mübarizəyə Misirə 14:12 qalib gəlib, Latviyaya 11:18 uduzub. Nəticədə 3 yığma eyni xal toplayıb, top fərqinə görə isə millimiz sonuncu olub.

Qeyd edək ki, bu gün kişilərdə Montenqro, Ruanda, Kanada və Böyük Britaniya, qadınlarda isə Braziliya, Çili, Latviya və Misir Monqolustanın paytaxtı Ulan-Batorda keçiriləcək Dünya Kubokuna vəsiqə verən 3 komanda olmaq üçün mübarizə aparacaq.