Həndbol üzrə növbəti mövsümə yekun vurulub.

Prosport.Az xəbər verir ki, “AHF Arena”da təşkil olunan başlanış mərasimində iştirakçılara Azərbaycan Həndbol Federasiyasının prezidenti Saleh Məmmədovun salamlarını çatdıran federasiyanın vitse-prezidenti Orxan Abbasov mövsümün gərgin və maraqlı mübarizə ilə yadda qaldığını vurğulayıb.

Dövlət himni səsləndirildikdən sonra mükafatlandırılma mərasimi keçirilib.

Əvvəlcə ölkə kubokunun sahibləri – kişilərdən ibarət “Kür” (Mingəçevir) və qadınlardan ibarət “Azəryol” komandalarına kuboklar və AHF-nin mukafatları təqdim olunub. Finala yüksələn kollektivlərin üzvlərinə həmçinin AHF-nin medalları və Azərbaycan Gənclər və İdman Nazirliyinin diplomları verilib.

Ardınca ölkə çempionatının nəticələrinə əsasən fərqlənən komandalar mükafatlandırılıb.

Qadınlar arasında Azərbaycan çempionu “Azəryol”un üzvlərinə qızıl, “Qarabağ”a gümüş, “Kür”ə bürünc medallar təqdim olunub.

Kişilərdən ibarət “Kür” komandası isə qızıl medallarına qovuşub. “Bakı” komandası 2-ci yerin sahibi kimi gümüş, mövsümü 3-ncü yerdə bitirən “Azəryol” isə bürünc medallara sahib çıxıb. Fərqlənən kollektivlərin həndbolçularına AGİN-in diplomları, qalib komandaların üzvlərinə isə həmçinin federasiyanın qiymətli hədiyyələri verilib.

Qeyd edək ki, kişilərin finalında "Kür" "Bakı"ya 20:19, qadınların finalında isə "Azəryol" "Kür"ə 35:28 qalib gəlib.