Çimərlik futbolu üzrə Azərbaycan milli komandası Avropa çempionatının I seçmə mərhələsində (EBSL) 2-ci oyununu keçirib.

Prosport.Az xəbər verir ki, B divizionunun A qrupunda yer alan yığmamız Belçika ilə qarşılaşıb.

İspaniyanın Əndəlüs vilayətinin El Puerto de Santa Maria şəhərində təşkil olunan görüş Sahib Məmmədovun yetirmələrinin 2006-cı ildən sonra ilk dəfə bu yarışa qatılan rəqib üzərində 11:2 hesablı qələbəsi ilə yekunlaşıb.

Komandanın heyətində Ramil Əliyev 3, Comərd Baxşəliyev 2, Elşad Manafov, Kamil Hüseynov, Orxan Məmmədov, Amid Nəzərov, Sahib Məmmədov və Bayram Bayramlı hərəyə 1 dəfə fərqlənib. Qrup lideri Litva isə İngiltərəyə 4:2 qalib gəlib. Ardıcıl 2-ci qələbə ilə komandamız növbəti mərhələyə vəsiqə qazanıb.

Qeyd edək ki, seçməmiz ilk oyunda İngiltərə yığmasını 5:4 hesabı ilə məğlub etmişdi. Azərbaycan qrupdakı son matçını sabah lider Litvaya qarşı keçirəcək. Hazırda 5 xalla komandamız 2-cidir. Litva ilə matç lideri müəyyənləşdirmək üçün keçiriləcək.